Луѓето сè почесто ја присвојуваат хибридната шема за работа од дома двапати неделно, но изборот на деновите ќе изненади многумина.
Плановите за флексибилна работа на многу компании се насочени кон тоа да ги задржат работниците во канцеларија од вторник до четврток, а да работат од дома во понеделник и петок, но се покажува дека работниците почесто остануваат дома во четврток. Ова го покажуваат новите податоци од „ВФХ рисрч“ (WFH Research), тим академици, меѓу кои и Николас Блум од универзитетот „Стенфорд“, кој собрал податоци за навиките и ставовите на десетици илјади американски работници од почетокот на пандемијата.
Петок котира како најпопуларен ден за работа од дома во изминатите шест месеци, а веднаш зад него е четврток, додека среда е најпрефериран ден за работа од канцеларија.
Четврток е новиот понеделник
Четврток котира како втор најпопуларен ден за работа од дома.
Наодите покажуваат дека навиките продолжуваат да се менуваат речиси три години по пандемијата, а исто така фрлаат светло и кон тоа колку е тешко за компаниите да спроведат строги правила за враќање во канцеларија, особено со тврдоглаво тесниот пазар на трудот. „Пелотон“ (Peloton Interactive Inc.) е меѓу работодавците што ги повикаа вработените назад од вторник до четврток, додека други големи работодавци, како „Епл“ (Apple Inc.), сакаа вработени во канцеларија во вторник, четврток и еден дополнителен ден што ќе го одредат поединечните тимови.
Податоците за зафатеноста на канцелариите од безбедносната фирма „Касл системс“ (Kastle Systems Inc.) за октомври во десет големи града во САД, на пример, покажаа дека деновите во средината на неделата биле убедливо најчестите за работа со присуство. Неодамнешниот извештај од „Релогикс“ (Relogix), кој обезбедува аналитика за зафатеноста на организациите, исто така покажа дека вторник, среда и четврток се „најпожелните денови за одење во канцеларија“ и во Северна Америка и во Европа. Така, миграцијата кон четврток како популарен ден за работа од дома ги збуни експертите.
„За мене е изненадување што сега доминираат четврток и петок, а понеделник е трет“, вели Блум. „Долго мислев дека понеделник-петок е најдобра комбинација за работа во домашни услови, но очигледно не. Искрено, не сум сигурен зошто“.
Меѓу оние вработени што имаат можност да работат од дома, речиси половина прифатиле некаков хибриден распоред, според истражувачката група WFH. Нешто помалку од една третина се постојано в канцеларија, додека еден од пет испитаници се изјаснувал дека работи целосно од далечина. Четврток и петок се најпопуларната комбинација за работа од далечина меѓу оние што два дена работат од дома, откри групата на Блум, а потоа следува двоецот понеделник-петок.
.webp){kind=icon}
