.webp){kind=icon}
Работодавците во Британија, кои се очајни да регрутираат и задржат работници од генерацијата Зед, сè пoчесто нудат пократко работно време во петок во обид да ги пополнат слободните работни места во услови на тековната кадровска криза.
Онлајн порталот за вработување „Аѕуна“ (Adzuna) забележал пораст на огласи кои нудат пократки работни часови во петок, што ефективно значи дека работниците можат да го започнат викендот неколку часа порано. Овој март, имало 1.426 огласи за работа на страницата на кои биле наведени „пократки часови во петок“, во споредба со само 583 во истиот месец пет години претходно - пред пандемијата Ковид-19 да направи вистински пресврт во начинот на работа.
Работни бенефиции / Работодавците им нудат на кандидатите да го започнат викендот порано / Bloomberg
Придобивката се чини дека е наменета за помладиот персонал, на позиции со плати меѓу 20.000 и 40.000 фунти (50.000 долари), според податоците на „Аѕуна“ доставени до „Блумберг“. Тоа е повидливо во одредени индустрии, при што рекламите во живо на „Аѕуна“ прикажуваат 348 инженерски работни места. Имало 207 слични поволности понудени за работни места за продажба и 156 за улоги во информатичката технологија.
Ендрју Хантер, ко-основач на „Аѕуна“, вели дека промената го одразува фактот дека вработените бараат повеќе од работодавците по пандемијата.
„За оние кои бараат работа, компанија која нуди пократки работни часови во петок сигнализира дека тие се флексибилни во пристапот кон работното време и се грижат за благосостојбата на своите вработени - два фактора од најголема важност на денешниот пазар на труд“, посочува Хантер во изјава испратена преку е-пошта.
Работодавците кои ја нудат поволноста вклучуваат неколку средни и големи компании. Добавувачот на модни производи ДЦК (DCK Group) на списокот со поволности вклучува ран почеток на викендот за позицијата „мрчендајзинг“ (начин на унапредување на продажбата).
Компаниите се обидуваат со различни мерки, вклучително и четиридневна работна недела, со цел да привлечат персонал, соочени со рекордни слободни работни места.
Ема, 21-годишна вработена во музичка издавачка куќа во Лондон, чиј работодавец планира да го олабави работното време во петок во текот на јули и август, вели дека е возбудена од идејата да заврши порано и подобро да го искористи времето.
Пократко работно време во петок / Топ петте сектори кои ја нудат оваа мерка се насочени кон работници од генерацијата Зед / Bloomberg
Формалното (доколку е привремено), скратување на работното време значи и дека персоналот може да земе дополнителен слободен ден кога планира годишен одмор и тоа ќе се брои само како половина ден, објаснува Ема, која не сакала да го користи целото име во ситуација кога зборува за нејзиниот работодавец.
Сепак, обидите да се размрдаат условите сè уште не го ублажуваат проблемот со недостигот на работна сила во Британија. Во работната сила има 216.000 помалку работоспособни луѓе отколку пред пандемијата, што ја прави Британија единствената економија од Г7 која не се опорави на нивоата пред Ковид.
Некои остануваат скептични за вредноста од користењето поволности за привлекување на помлад кадар. „Во одреден момент ќе правите работи што не ви се допаѓаат“, напиша неодамна на Линкдин (LinkedIn), Луис Кемп од „Лајтбалб медија“ (Lightbulb Media) од Манчестер. „Да се биде доверлив, почитуван и соодветно платен вреди многу повеќе од пиците, празниците и одењето дома порано во петок“.
