.webp){kind=icon}
Просечниот работен ден се намалил за 37 минути во изминатата година, а помалку луѓе земаат прекувремени смени, што може да се смета за показател дека менаџерите сè повеќе внимаваат на рамнотежата помеѓу работата и животот во ерата по пандемијата на ковид.
Времето поминато на работа падна на 10 часа, од повеќе од 10 и половина на крајот на вториот квартал од 2022 година, според студијата на аналитичката компанија за работна сила „Активтрак“ (ActivTrak Inc). Но иако вработените одработуваат пократки периоди, продуктивноста не опаднала, посочува компанијата во студијата објавена во вторникот. Истражувањето анализирало 38 милиони работни часа на повеќе од 134.000 вработени на глобално ниво низ индустрии како финансиските услуги, здравството, осигурувањето и професионалните услуги.
„Она што го гледаме овде е навистина добивка во ефикасноста“, вели Габриела Мауч, потпретседателка на Лабораторијата за продуктивност на „Активтрак“. Студијата исто така откри пад во бројот на прекумерно ангажирани вработени или оние што често работат повеќе од редовното работно време, на 28 отсто, од 32 отсто една година претходно. Таа промена може да биде добра за менталната, физичката и финансиската благосостојба на вработените.
Пократките работни денови може да значат дека компаниите го слушаат „повикот за помош на работниците што се однесува на исцрпеноста“, посочува Мауч. Сепак, според студијата, речиси една третина од вработените продолжуваат да бележат денови што се подолги од 10 часа.
