Истражување: Вработените што работат оддома се 18 отсто помалку продуктивни

Ново истражување што открива пониска продуктивност при работа оддома ја разгоре дебатата за вредноста на ваквиот начин на работа наспроти работата во канцеларија.

Студијата на Институтот за технологија во Масачусетс (МИТ) и Универзитетот на Калифорнија (УЦЛА) покажа дека работниците што по случаен избор биле одредени да работат оддома биле значително помалку продуктивни (18 проценти) од оние во канцеларија.

Истражувачите набљудувале нововработени работници за внесување податоци во Индија што по случаен избор биле назначени да работат оддома или во канцеларија. Тие посочуваат дека две третини во падот на продуктивноста се видливи уште од првиот работен ден. Преостанатата разлика се создала со текот на времето, бидејќи канцелариските работници го стекнале знаењето побрзо од колегите што работеле од далечина.

Изненадувачки, работниците што претпочитаат да работат оддома биле уште помалку продуктивни од оние што сакаат да бидат во канцеларија.

Иако авторите велат дека нивното истражување не е водич за донесување одлуки, истражувањето е најново дополнување на дебатата што гори во деловните сали за состаноци и меѓу академските кругови, откако пандемијата ги принуди речиси сите да работат оддома. Спротивставените страни сега можат да цитираат истражувања што одат во прилог на нивните ставови, без разлика дали се согласуваат со Џејми Дајмон, извршниот директор на „ЏП Морган“ (JPMorgan Chase & Co.), кој смета дека работата оддома „не функционира“, или со Брајан Чески, извршен директор на „Ербиенби“ (Airbnb), кој ја поддржува флексибилноста.

Според Хозе Марија Бареро, економист и коосновач на ВФХ (WFH Research), група посветена на проучување на можностите за работа од ома, ова најново истражување е во согласност со други истражувања што покажаа дека работата со полно работно време оддома носи помала продуктивност од целовремена канцелариска работа или хибридна работа. Сепак, иако работата со полно работно време оддома е помалку продуктивна, може да биде профитабилна за бизнисите како начин да се заштедат значителни суми од изнајмување работни простории.

За повеќето луѓе најважен е хибридниот режим на работа Bloomberg

Новото истражување истакнува предизвици својствени за истражувањето на продуктивноста. Бидејќи работниците во оваа студија се нововработени, нивните резултати може да се разликуваат од вработените што се префрлаат на работа со полно работно време оддома само откако првично ќе поминат значително време на работното место.

„Очигледно ќе има голема разлика помеѓу некој што веќе го разбира бизнисот, ја знае културата на компанијата и знае како течат работите, а потоа ќе му кажете дека може да работи оддома неколку дена во неделата“, рече Дејвид Аткин, професор по економија на МИТ и еден од коавторите на истражувањето. „Кога размислуваме за извлекување дополнителни заклучоци, треба да бидеме внимателни“.

Ова истражување не ги дава сите одговори за менаџерите што се обидуваат да управуваат со конфузијата предизвикана од хибридната работа (обично два дена на работа од далечина, а три во канцеларија), која е доминантен модел на работа во САД.

Неодамнешна анализа на сопствената работна сила на „Мекинзи“ (McKinsey & Co.) откри дека околу 50 отсто од времето минато на работното место е оптимално за хибридна работа. Сè повеќе од тоа оди на сметка на флексибилноста и времето на фокусирање наместо подобрување на перформансите. Други студии открија дека хибридните аранжмани немаат значително влијание врз продуктивноста, иако вработените се значително посреќни и со помала веројатност да ги напуштат своите работни места.

„Голем број написи што ја критикуваат работата оддома и даваат докази дека работењето оддома е помалку продуктивно, всушност зборуваат за целосно работење оддома, а всушност за повеќето луѓе што можат да работат оддома е важен хибридниот начин на работа“, посочува Бареро. „Важно е да се имаат на ум тие разлики“.

Аткин од МИТ се согласува. „Поголемиот дел од дискусијата сега е за тоа што е следно на спектарот за работа оддома“, рече тој. „Дали ќе работиме целосно оддома или во канцеларија? Мислам дека ќе завршиме некаде помеѓу“.

Во моментов нема коментари за веста. Биди прв да коментира...

Остави коментар