Компаниите чии шефови живеат на 5 километри од нивното седиште известуваат за подобри услови на работното место и поголема продуктивност, според неодамнешен труд заснован на податоци од Данска.
Студија на тројца академици истражувала илјадници дански фирми и локациите на нивните главни извршни директори. Тие го квантифицирале квалитетот на работното место гледајќи ги административните забелешки за лоши услови поднесени од Данската управа за работна средина помеѓу 2008 и 2015 година и користеле анкети на вработените за да добијат чувство за тоа како размислуваат за компанијата во која работат.
Околу една третина од фирмите што ги анализирaле биле раководени од извршни директори кои живеат во близина. Тие компании имале 3,6 процентни поени помали шанси да добијат опомена од владата за прашања поврзани со работното место. Кога биле анкетирани, вработените во тие компании рекле дека се чувствуваат значително повеќе вклучени во одлуките на работното место и ги оцениле нивните работни средини како поправедни и поинклузивни.
„Покажуваме дека кога [извршните директори] имаат географски поврзано чувство со локалната заедница, со соседството, тоа е моќен двигател не само за благосостојбата на вработените, туку и за перформансите на компанијата во целина“, вели Марио Даниеле Аморе, вонреден професор по менаџмент и технологија на миланскиот универзитет „Бокони“ (Bocconi) и коавтор на трудот. „Во суштина, на сите им е подобро“, заклучува тој.
Bloomberg
Аморе ја спровел студијата со Мортен Бенедсен, професор по економија на Универзитетот во Копенхаген и Бирте Ларсен, вонредна професорка по економија на Бизнис школата во Копенхаген.
Тие, исто така, откриле дека живеењето во близина не значи дека жителите ги опфаќаат и истите социјални простори. За да навлезат подлабоко во тоа како врските во заедницата влијаат на работното место, истражувачите погледнале во една локална институција со голема веројатност дека извршните директори ќе се соочат со вработените: во училиштата од соседството.
„Идејата е дека, ако вие како извршен директор имате дете кое оди во истото училиште со децата на вашите вработени, тогаш повеќе ќе комуницирате со овие вработени во вашиот личен живот“, објасни Аморе.
Тие интеракции се чини дека се значајни, додава тој. Извршните директори чии деца посетувале исто училиште како и децата на нивните вработени воделе компании кои имале два процентни поена помала веројатност да добијат негативни оценки од Управата за работна средина.
Истражувачите, исто така, прашале група извршни директори за нивните емоционални и психолошки приврзаности кон нивните населби за да ја квантифицираат т.н. „дистанцата на размислување“ од местото каде што се наоѓа нивната компанија, како што го опиша Аморе.
„Ако тие веруваат дека соседството е поважно од културен аспект, ќе управуваат со фирмите на начин кој има помала веројатност за административни забелешки“, нагласи тој.
Овие комбинирани анализи ги навеле истражувачите да утврдат дека придобивката од географската близина не е само тоа што пократкото патување им овозможува на извршните директори побрзо да влезат на работа и подобро да надгледуваат. Она што е важно се социјалните интеракции меѓу вработените и раководството што оваа блискост може да ги олесни.
Културната динамика на Данска може да ги направи ваквите средби почести отколку што би биле во другите меѓународни економски центри. Сегрегацијата според социо-економскиот статус е помалку интензивна во Данска отколку другите делови на Европа или САД, на пример, иако неодамнешните извештаи сугерираат дека поделбите се зголемуваат, што доведува до помала класна разновидност во локалните училишни системи.
Околу половина од фирмите што истражувачите ги проучувале во Данска биле во семејна сопственост, рече Аморе, што значи дека извршниот директор веројатно ќе остане подолго време и ќе изгради повеќе соседски врски со текот на времето. Што се однесува до тоа што значи ова за ефектите на извршните директори кои работат на далечина врз остатокот од нивната работна сила, Аморе се двоумел да каже бидејќи податоците што ги користеле биле собрани пред пандемијата.
Но, ако вашата компанија сè уште има физичко седиште, студијата нуди еден предлог до шефовите: Бидете блиску до него.
.webp){kind=icon}
