„Вуп“ собра 575 милиони долари, вреднувањето достигна 10 милијарди пред ИПО

„Вуп“ (Whoop Inc.), производителот на популарните фитнес-алки без екран, е вреднуван на 10,1 милијарди долари, откако обезбеди дополнителни 575 милиони долари, и сега чекори кон излез на берза.

Компанијата, која има повеќе од 2,5 милиони члена, во 2025 година остварила позитивен паричен тек и забележала раст на претплатите од 103 отсто во истиот период, соопшти за „Блумберг њуз“. Рундата од серијата Г ја предводеше „Колаборатив фонд“ (Collaborative Fund), со учество на инвеститори, меѓу кои „Катар инвестмент“ (Qatar Investment Authority), „Мубадала инвестмент“ (Mubadala Investment Co.), „Абот“ (Abbott Laboratories) и „ГП Булхаунд“ (GP Bullhound).

Во рундата се приклучија и неколку познати индивидуални инвеститори, меѓу кои професионалните спортисти Кристијано Роналдо, Леброн Џејмс, Рори Мекилрој и Реџи Милер. Компанијата со седиште во Бостон претходно беше вреднувана на 3,6 милијарди долари по рунда од 200 милиони долари во 2021 година. Досега има собрано повеќе од 950 милиони долари.

„Ова ново финансирање ни овозможува дополнително да го зајакнеме билансот и да инвестираме повеќе во делови од бизнисот што веќе даваат резултати“, изјави основачот и главен извршен директор Вил Ахмед во интервју. „Имаме многу амбициозна мапа за истражување и развој во која ќе продолжиме да вложуваме.“

Bloomberg

Компанијата ќе ги искористи средствата и за зголемување на маркетинг-активностите, проширување на продажбата преку трети страни, зајакнување на понудата во големопродажба и малопродажба, како и за продолжување на меѓународната експанзија, додаде тој.

„Вуп“ е дел од растечка група на потрошувачки хардверски брендови што пристапуваат пошироко кон фитнесот, надминувајќи го едноставното следење тренинзи. Компанијата, заедно со конкуренти како производителот на паметни прстени „Оура хелт“ (Oura Health Oy), сè повеќе се фокусира на проактивно следење на здравјето на корисниците и нудење препораки за подобрување. „Оура“ минатата есен заврши сопствена рунда финансирање, со која беше вреднувана на слично ниво од 11 милијарди долари.

Ахмед изјави дека ја замислува „Вуп“ како „оперативен систем за здравје“, кој користи сопствени модели на вештачка интелигенција за континуирана анализа на здравствени податоци и во иднина би можел да предвидува срцеви удари, мозочни удари и други состојби.

Постојат докази дека ваквиот пристап дава резултати. Приходите од резервации, мерка за раст што ги вклучува средствата што членовите ги плаќаат однапред, пораснале за 103 отсто во 2025 година, достигнувајќи годишен приходен ритам од 1,1 милијарда долари, соопшти „Вуп“. За споредба, базата од околу 2,5 милиони члена е на слично ниво со фитнес-технолошката компанија „Пелотон интерактив“ (Peloton Interactive Inc.), која има близу 2,7 милиони претплатници на своите уреди. „Оура“, пак, има продадено повеќе од 5,5 милиони прстени и остварува над 1 милијарда долари годишен приход.

„Вуп“ и дел од неговите конкуренти се под зголемен надзор од американските регулатори, кои сметаат дека некои фитнес-уреди за широка потрошувачка ја бришат границата меѓу апаратчиња и медицинска опрема. Во јули Управата за храна и лекови побара од „Вуп“ да ја отстрани функцијата за следење крвен притисок кај најскапиот модел на белезица, тврдејќи дека функционира како медицински уред без соодветно одобрение. Компанијата одби да ја исклучи алатката, но продолжи со преговори со агенцијата.

Оттогаш, регулаторот излезе со ажурирани насоки што ја поддржуваат идејата дека следењето на крвниот притисок може да се користи во производи што се пласираат како велнес-уреди.

„Вуп“, основана во 2012 година, е во фаза на интензивно вработување, со планови да го зголеми бројот на вработени до 75 отсто за да го поттикне растот пред потенцијален излез на берза, изјави Ахмед во текот на овој месец за „Блумберг“. Компанијата, која моментално има околу 800 вработени со полно работно време, планира да отвори повеќе од 600 нови работни позиции во различни сектори, вклучувајќи софтвер, истражување, дизајн, хардвер, развој на производи, производство, продажба и маркетинг.

Меѓународните пазари се клучен двигател на растот во последните години. „Вуп“ моментално работи во 60 земји, при што 60 отсто од продажбата доаѓа од надвор од САД. Само пред четири години американскиот пазар сочинувал околу 70 отсто од нејзината база на членови.