'Лимак' ја гаси едната фирма, другата сврте 1,5 милиони евра

Тие се едни од најактивните  компании во моментов во град Скопје откако уште во 2018 година почнаа да го градат „Diamond Skopje“. Станува збор за мултифункционален објект од кој досега профункционира само Лимак хотелот со 5 ѕвезди. Носител на проектот е турската компанија Лимак Холдинг, а ние во Bloomberg Adria анализираме какви се показателите за работењето на фирмата овде во Македонија во последните две години особено откако со работа почна и хотелот. Во сега веќе далечната 2013 година, турскиот инвеститор отвори две фирми во Македонија – едната е „Лимак АД за градба, индустрија и трговија Подружница Скопје“, а другата е „Лимак“ ДОО Скопје.

„Лимак“

Од увидот во кредитните извештаи на двете фирми дознавме дека првата фирма моментно е во ликвидација, односно со „Лимак АД за градба индустрија и трговија Подружница Скопје“ веќе раководи ликвидатор. Во текот на минатата година вкупните средства на оваа компанија изнесуваат околу 388 илјади денари, нема ниту еден вработен и има EBITDA од над 208 илјади денари (3,4 илјади евра). Постапката за ликвидација е објавена во јули годинава. Во текот на 2021 година компанијата не остварила приходи, додека трошоците изнесуваат 208 (3,4 илјади евра) илјади денари, колку што е и загубата. Ако се анализираат претходните години, најголемите приходи се нешто над 16 илјади денари и се остварени во 2017 година, кога и трошоците биле најголеми односно над 450 илјади денари ( над 7.000 евра) . Во сите години од 2016 наваму од кога имаме податок немало ниту еден вработен во ова фирма.

Лимак го отвори хотелот со пет ѕвезди, еден од најлуксузните во градот во април минатата година. Тој е впрочем дел од големата мултифункционална градежна инвестиција на „Лимак Холдинг“ со вкупна вредност од 250 милиони евра.

„Лимак“

Дали отворањето на хотелот имаше и финансиски плус за компанијата? Додека едната фирма е во ливидација од билансите на другата - Лимак ДОО, се гледа раст на вредноста на компанијата, но и значајно зголемување на приходите од работењето во 2021 година, кога драстично сепак се зголемиле и компаниските трошоци.

Според податоците, Лимак ДОО имал вкупни приходи од над 90 милиони денари (1,5 милиони евра) во 2021 година, што е значајно повеќе од претходната 2020 година кога приходите изнесувале нешто над 5 милиони денари (8,3 илјади евра).

Од друга страна компанијата има расходи во вкупна вредност од 219 милиони денари (3,6 милиони евра) или нето загуба од над 128 милиони денари (два милиони евра), што сепак е помалку од загубата во 2020 година.

Во 2021 година драстично пораснал и бројот на вработени, од 84 во 2020 до 189 мината година. Просечната плата која им  е исплатена е околу 24.000 денари.

Мултифункционалниот комплекс „Diamond of Skopje“ треба да има површина од 325.000 квадратни метри. Се градат четири резиденцијални објекти со дополнителен деловен простор и 3.200 места  за паркирање, современ трговски центар и голема подземна сообраќајница која ќе го спојува источниот со западниот дел од градот. Дел од комплексот е и хотелот.

Групацијата „Лимак“ со своите деловни активности е присутна во повеќе од 17 земји во светот, со повеќе од 60.000 вработени кои работат во неколку сектори: градежништво, енергетика, туризам, инфраструктура и други дејности. Во портфолиото на „Лимак“ се и светски познати мега проекти, како новиот аеродром во Истанбул (Istanbul Grand Airport).