Бил Акман префрла милијарди од „Гугл“ во „Мајкрософт“

Хеџ фондот „Першинг сквер“ на милијардерот Бил Акман изгради удел вреден 2,1 милијарда долари во „Мајкрософт“, искористувајќи го падот на цената на акциите за да инвестира во бизнис за кој смета дека е посилен и поотпорен отколку што инвеститорите моментално проценуваат.

„Першинг сквер“ го направи „Мајкрософт“ една од своите клучни инвестиции, напиша Акман во објава на мрежата X, опишувајќи го пакетот Офис 365, вклучувајќи ги Ворд и Ексел, како и облак-услугата Азур, како „две од највредните франшизи во деловната технологија“. Уделот на „Першинг сквер“ сочинува помалку од една десетинка од вкупната пазарна вредност на „Мајкрософт“.

Акман исто така наведе дека „го продал 'Гугл'“ одговарајќи на друг корисник на мрежата X, но не прецизираше колкав дел од вложувањето во „Алфабет“ е намалено ниту дали станува збор за нова продажба. „Першинг сквер“ уште во декември објави дека продал околу 4,1 милион акции на „Алфабет“, односно поголемиот дел од својот удел, покажуваат податоците собрани од „Блумберг“ Фондот тогаш имал нешто повеќе од 678.000 акции.

„Да бидам јасен, продажбата на акциите на 'Гугл' не беше облог против компанијата,“ напиша Акман во посебна објава. „Долгорочно сме многу оптимисти кога станува збор за 'Алфабет'. Но, при сегашните процени и ограничениот капитал со кој располагаме, 'Гугл' го користиме како извор на средства за вложување во 'Мајкрософт'“.

Акциите на „Мајкрософт“ пораснаа во петокот за 3,1 отсто, што е нивниот најдобар дневен резултат во последниот месец, додека акциите на „Алфабет“ паднаа за 1,1 отсто.

Од почетокот на годината, акциите на „Мајкрософт“ изгубиле околу 13 отсто од вредноста, додека најголемата светска софтверска компанија се соочува со сомнежи на пазарот во врска со усвојувањето на ВИ асистентот Копилот и прашањето дали Офис 365 може да се спротивстави на конкуренцијата. Компанијата од Редмонд, во сојузната држава Вашингтон, исто така има проблем да ги прошири капацитетите на дата-центрите доволно брзо за да одговори на растечката побарувачка за облак-услуги.

Акман ја стекна својата репутација како активен инвеститор со силно присуство на социјалните мрежи и подготвеност да презема значајни позиции во релативно мал број компании (акции). Според Bloomberg Billionaires Index, богатството на Акман се проценува на 12,5 милијарди долари.

Акман го опиша Мајкрософт офис 365 како производ кој е „длабоко вграден“ во работењето на големите компании и поддржан од инфраструктура која е „речиси невозможно да се копира“. Силната побарувачка за Aзур, според него, покажува дека загриженоста околу забавувањето на растот е „погрешна“.

„Мајкрософт“ е релативно нова инвестиција во портфолиото на Акман со големи технолошки компании. Освен „Алфабет“, неговиот фонд веќе има значителни удели во „Амазон“ и „Meтa“. Акман во објава на мрежата X потсети и дека „Мајкрософт“ поседува важни бизниси надвор од своите главни франшизи, вклучувајќи ги Линкедин и Иксбокс.

Во април, „Мајкрософт“ и „Опен-еј-ај“  постигнаа договор со кој технолошкиот гигант се откажа од ексклузивното право за продажба на ВИ моделите на стартапот, отворајќи простор компанијата кои стои зад Чет ГПТ да склучува договори и со конкуренти како „Амазон“. Редефинирањето на ексклузивното партнерство пазарот главно го протолкува како победа за „Опен-еј-ај“, кој бара соработка со поголем број облак-провајдери за да ги задоволи растечките потреби за компјутерска моќ.

Акман смета дека реструктурирањето на партнерството со „Опен-еј-ај“ не е отстапка, туку „промислен пресврт кон поотворен систем кој користи повеќе модели на вештачка интелигенција и подобро одговара на потребите на корпоративните клиенти“.

Кога „Першинг сквер“ купи удел во „Мета“, Акман исто така тврдеше дека инвеститорите го потценуваат долгорочниот потенцијал на таа компанија во областа на вештачката интелигенција. Минатата година, кога откри вложување во „Амазон“, процени дека компанијата ќе го надмине забавувањето на растот на облак-бизнисот. Акциите на „Мета“ во 2026 година паднаа за седум проценти, додека „Амазон“ зајакна за 14 проценти.