„Антропик“ пред рунда од над 30 милијарди долари и вреднување поголемо од 900 милијарди

„Антропик“ (Anthropic PBC) е пред затворање на нова рунда финансирање што би можела да надмине 30 милијарди долари при проценета вредност поголема од 900 милијарди долари, веќе следната недела, според лица запознаени со процесот.

„Секвоја капитал“ (Sequoia Capital), „Драгонер“ (Dragoneer Investment Group), „Алтиметер“ (Altimeter Capital) и „Гриноукс“ (Greenoaks Capital Partners) се очекува заеднички да ја предводат рундата, при што секоја компанија планира да инвестира околу две милијарди долари.

Вкупните инвестиции во рундата моментално се движат над целта од 30 милијарди долари што ја поставил „Антропик“, а се очекува да учествуваат и повеќе постојни инвеститори во компанијата.

„Антропик“ со ова би ја престигнал „Опен еј-ај“ (OpenAI) и би станал највредниот стартап за вештачка интелигенција во светот.

Лицата запознаени со процесот, кои побараа анонимност бидејќи информациите не се јавни, велат дека секоја од водечките инвестициски компании планира вложување од околу две милијарди долари. Во рундата се очекува да учествуваат и „Фаундерс фонд“ (Founders Fund) на Питер Тил и „Џенерал каталист“ (General Catalyst).

Обврските за инвестиции сè уште се финализираат и условите може да се променат.

Големата рунда финансирање беше договорена за само неколку недели, што укажува на силна побарувачка од инвеститорите за компанијата што стои зад четботот Клод. „Блумберг њуз“ претходно објави дека „Антропик“ кон крајот на април разгледувал ново финансирање при вреднување над 900 милијарди долари, откако добил повеќе понуди од инвеститори. Разговорите официјално започнале претходно овој месец.

„Антропик“, „Фаундерс фонд“, „Секвоја“ и „Џенерал каталист“ одбија да коментираат. „Драгонер“, „Алтиметер“ и „Гриноукс“ не одговориле на барањата за коментар. „Фајненшл тајмс“ претходно објави дел од деталите за учесниците во рундата.

Компанијата е основана во 2021 година од група поранешни вработени во „Опен еј-ај“ и оттогаш се наметна како еден од лидерите во секторот за вештачка интелигенција. „Антропик“ разви серија ВИ-алатки наменети за трансформација на деловните процеси, од програмирање до сајбер-безбедност. Според „Блумберг њуз“, и „Антропик“ и „Опен еј-ај“ се очекува да излезат на берза уште оваа есен.

„Антропик“ очекува приходите во вториот квартал да достигнат 10,9 милијарди долари, повеќе од двојно над нивото од претходниот квартал, поради растечката побарувачка за неговиот ВИ-софтвер, објави „Блумберг њуз“. Компанијата е на пат да го оствари и својот прв профитабилен квартал.

Компанијата им соопштила на инвеститорите дека годишниот приход пресметан врз основа на тековното темпо на продажба ќе надмине 50 милијарди долари до крајот на следниот месец, велат лица запознаени со процесот. Минатиот јули овој показател изнесувал четири милијарди долари.

На конференција овој месец, извршниот директор Дарио Амодеи изјави дека компанијата забележала „80-кратен раст“ на годишните приходи и користењето во првиот квартал од годинава. Поради тоа, рече тој, стартапот „работи што е можно побрзо“ за да обезбеди дополнителни компјутерски ресурси за поддршка на услугите.

„Антропик“ склучи договор вреден речиси 45 милијарди долари со „Спејс Икс“ (SpaceX) на Илон Маск и договор од 1,8 милијарди долари со „Акамај технолоџис“ (Akamai Technologies Inc.) за проширување на компјутерските капацитети. Компанијата користи и чипови и облак услуги од „Алфабет“ (Alphabet Inc.).

„Антропик“ бара дополнително финансирање и од дел од своите добавувачи. „Гугл“ (Google) неодамна се обврза да инвестира 10 милијарди долари во стартапот при вреднување од 350 милијарди долари, исто како и во февруарската рунда финансирање. „Гугл“ планира да вложи уште до 30 милијарди долари доколку компанијата исполни одредени цели за перформанси.

„Амазон“ (Amazon.com Inc.) претходно соопшти дека инвестира пет милијарди долари во „Антропик“ при вреднување од 350 милијарди долари, со план со текот на времето да вложи уште 20 милијарди долари. Засега не е јасно дали овие две компании ќе учествуваат и во новата рунда финансирање.

„Опен еј-ај“ последен пат беше вреднуван на 852 милијарди долари во рундата финансирање завршена во март. Компанијата се очекува во наредните денови да ја поднесе документацијата за излегување на берза.