„Голдман Сакс“: Расте апетитот за банкарски спојувања во Европа

Причините за спојувања и преземања (M&A) меѓу европските банки растат, дури и покрај пречките за прекугранични поврзувања, тврди еден од водечките експерти за финансиски трансакции во регионот.

„Последните две години беа феноменални во смисла на одржување на профитабилноста на споредливо високи нивоа“, изјави во интервју Дирк Лиевенс, кораководител на одделот за финансиски институции во Европа во компанијата „Голдман Сакс“ (Goldman Sachs Group Inc). „Клучното прашање за сите во овој момент е: генерираме капитал  - како можеме најпродуктивно да го искористиме?“

Европскиот банкарски сектор забележа низа обиди за спојувања и преземања во текот на последните неколку години, вклучувајќи го најновиот бран што се одвива во Италија, каде што две најголеми кредитни институции се соочуваат со она што би можело да прерасне во битка на понуди за банката „Монте Паски“ (Banca Monte dei Paschi di Siena SpA). Сепак, националните интереси и регулативата исто така ги кочат меѓународните трансакции, вклучувајќи ја понудата на „Уникредит“ (UniCredit SpA) за „Комерцбанк“ (Commerzbank AG).

Валуациите растат до ниво каде што на управите им има повеќе смисла да размислуваат за аквизиции отколку за откуп на сопствени акции, изјави Лиевенс, кој работел на некои од најголемите банкарски трансакции во последните години.

„Кога со акцијата се тргува по цена што е шест пати поголема од добивката (P/E 6), лесно е да се оправда купување на сопствената добивка наместо туѓа“, рече тој. „Но кога се тргува поблиску до однос од десет пати, тоа можеби веќе не е случај.“

Иако Лиевенс алудираше на напредок во однос на политичката волја да се дозволи консолидација на европските банки, значајни пречки сè уште постојат. „Гледаме дека дува поволен ветер од наднационалните структури“, рече тој, наведувајќи ги Европската централна банка и Европската комисија. Сепак, „реалноста на терен на национално ниво покажува понијансирана слика“, додаде тој.

„Комерцбанк“ ја ангажираше „Голдман сакс“ (Goldman Sachs Group Inc.) да ѝ помогне во стратегијата за одбрана од понудата на „Уникредит“ (UniCredit SpA).

Германската банка ја отфрли понудата на „Уникредит“ за преземање вредна 37 милијарди евра како прениска и ги повика инвеститорите да ја одбијат. Германскиот кредитор исто така порача дека е отворен за разговори ако „Уникредит“ ја подобри понудата и претстави стратегија за споен ентитет - иако локалните политичари сè уште се противат на тоа поврзување.

Лиевенс истакна дека постои поедноставен начин за решавање дел од напнатоста околу прекуграничните банкарски спојувања во Европската Унија, со оглед на тоа што дискусиите за пречките честопати се насочуваат кон тешко решлив проблем на недостиг од заедничко осигурување а депозити.

„Усогласувањето на европските правила за преземања треба да биде приоритет“, рече тој. „Во моментов тие значително се разликуваат, што ја кочи консолидацијата и на крајот ја ослабува конкурентноста на Европа.“