Акциите на „Оракл“ (Oracle Corp.) паднаа во претпазарното тргување откако компанијата објави квартални капитални расходи повисоки од проценките, што ги зголеми стравувањата кај инвеститорите за профитабилноста на бизнисот со инфраструктура за вештачка интелигенција.
Капиталните расходи, кои во голема мера претставуваат мерка за трошоците за центрите за податоци, изнесуваа околу 16,5 милијарди долари во периодот што заврши на 31 мај, со што годишниот износ достигна 55,7 милијарди долари - повеќе од проекцијата на „Оракл“ за 50 милијарди долари трошоци.
Компанијата очекува да потроши околу 70 милијарди долари за нето капитални расходи во тековната фискална година, која завршува во мај 2027 година, изјави главната финансиска директорка Хилари Максон за време на конференцискиот повик по објавувањето на резултатите во средата. Пријавената бројка ќе биде за 20 до 25 милијарди долари повисока поради авансни плаќања за одредени компоненти, рече таа.
„Оракл“, долго познат по својот софтвер за бази на податоци, се преобликува во обезбедувач на компјутерска моќ за работа со вештачка интелигенција и започнува масовна изградба на центри за податоци за „Опен еј-ај“ (OpenAI) и други клиенти. За да ги покрие капиталните потреби, компанијата соопшти дека обезбедила 43 милијарди долари преку должничко финансирање и пет милијарди долари преку капитал во фискалната година што штотуку заврши.
Акциите на „Оракл“ паднаа за околу 11 отсто во раното тргување во четвртокот пред отворањето на пазарите во Њујорк, откако претходно затворија на 201,26 долари. Акцијата порасна за 35 отсто во изминатите три месеци, веројатно поттикната од подоброто расположение на инвеститорите кон компаниите што обезбедуваат компјутерска инфраструктура и кон „Опен еј-ај“, најважниот клиент на „Оракл“, напиша Дерик Вуд, аналитичар во „ТД Ковен“ (TD Cowen).
Во фискалната 2027 година компанијата планира да обезбеди уште 40 милијарди долари преку капитал и долг, вклучително и 20 милијарди долари преку претходно најавената програма за повремена продажба на акции по пазарни цени.
Технолошкиот сектор се соочува со нови сомнежи за приносите од досега невидениот бран на трошење финансиран со долг. „Оракл“ има околу 117 милијарди долари долг во индексот на висококвалитетни корпоративни обврзници на Блумберг за САД, што ја прави најголем издавач надвор од финансискиот сектор.
Трошењето на „Оракл“ експлодира поради проектите за центри за податоци
Компанијата потроши 55,7 милијарди долари во последната фискална година
Извор: Oracle
Во четвртиот фискален квартал приходите пораснаа за 21 отсто на 19,2 милијарди долари, соопшти „Оракл“ во средата. Добивката, без одредени ставки, изнесуваше 2,11 долари по акција. Аналитичарите во просек очекуваа приспособена добивка од 1,97 долари по акција при приходи од 19,1 милијарда долари, според податоците собрани од Блумберг.
Продажбата во внимателно следениот сегмент на облачна инфраструктура порасна за 93 отсто на 5,8 милијарди долари. Тоа претставува малку побрз раст од 91 отсто што го очекуваа аналитичарите.
Вкупните приходи од облакот, вклучувајќи софтверски апликации и инфраструктура, ќе скокнат за околу 61 отсто во кварталот што завршува во август. Таа прогноза е малку под просечната проценка на аналитичарите од 62 отсто.
Преостанатите обврски за извршување, показателот за идните нарачки, изнесуваа 638 милијарди долари на крајот од кварталот, во споредба со просечната проценка од 589,5 милијарди долари. „Оракл“ соопшти дека најголемиот дел од новите нарачки се однесуваат на големи договори за вештачка интелигенција, при кои клиентот однапред ги плаќа скапите сервери потребни за работата.
„Ова значително го намалува износот на капитал што „Оракл“ мора да го обезбеди за изградба на нашите центри за податоци за вештачка интелигенција“, соопшти компанијата.
Големите центри за податоци на „Оракл“ за „Опен еј-ај“ бележат „значителен напредок“, изјави коизвршниот директор Клеј Магујрк за време на повикот. На пример, компанијата испорачала 42 отсто од капацитетот на својата главна локација во Абилин, Тексас, а дополнителни 35 отсто треба да бидат испорачани во следните три месеци, рече тој.
Почнувајќи од март, „Оракл“ отпушти илјадници работници низ целата компанија. Неколку аналитичари изјавија дека овие потези веројатно ќе ги подобрат маржите и ќе помогнат да се надоместат огромните трошоци за центрите за податоци. Компанијата објави дека потрошила 1,8 милијарди долари за реструктурирање во фискалната година, речиси пет пати повеќе отколку една година претходно.
.webp){kind=icon}
