Кинескиот ВИ еднорог „Муншот“ се подготвува за излегување на берза за шест месеци

„Муншот ВИ“ (Moonshot AI) ги известил инвеститорите дека ќе излезе на берза за шест месеци, користејќи ја можноста да прибере капитал откако неговиот најнов модел ја промени перцепцијата за можностите на Кина во областа на вештачката интелигенција и ги разниша глобалните технолошки пазари.

Кинескиот пионер во областа на вештачката интелигенција официјално до своите инвеститори доставил предлог-одлука на акционерите, барајќи нивна согласност за излегување на берзата во Хонгконг. Тоа укажува дека иницијалната јавна понуда на акции (ИПО) би можела да следува веќе во наредните шест месеци.

„Муншот ВИ“ е во завршна фаза од новата рунда финансирање, во која вредноста на тригодишниот стартап би можела да надмине 30 милијарди долари, наведоа извори.

Компанијата проценила дека сега е вистинскиот момент за излегување на берза откако нејзиниот годишен приход - АРР, показател за идната продажба, во јуни достигнал 300 милиони долари. Изворите сакале да останат анонимни бидејќи зборуваат за приватен финансиски аранжман. „Блумберг њуз“ претходно објави дека „Муншот“ уште во април достигнал АРР од 200 милиони долари.

Компанијата се подготвувала за излегување на берза уште пред минатата недела да го претстави Кими К3, напреден модел, за кој тврди дека според вкупните способности ги надминува сите конкуренти, освен Клод Фејбл 5 на „Антропик“ (Anthropic) и ГПТ-5.6 на „Опен еј-ај“ (OpenAI). Многу експерти биле импресионирани од неговите можности и големина – моделот има 2,8 билиони параметри – особено затоа што станува збор за модел со чии параметри им се достапни на корисниците за преземање и приспособување.

ИПО-то би претставувало важна пресвртница за овој стартап, кој на почетокот на 2023 година го основал Јанг Жилин, поранешен професор на Универзитетот Цингхуа, кој претходно работел во компаниите „Мета“ (Meta Platforms) и „Гугл“ (Google) на „Алфабет“ (Alphabet). Името на компанијата на кинески јазик гласи „Темната страна на Месечината“ (Dark Side of the Moon), според омилениот албум на нејзиниот основач од групата Пинк Флојд.

Стартапот уште на почетокот на годината почнал да разгледува излегување на берзата во Хонгконг и водел разговори со „ЦИЦЦ“ (China International Capital Corp.) и „Голдман Сакс“ (Goldman Sachs Group) за организирање иницијална јавна понуда на акции, претходно објави „Блумберг њуз“. Кинескиот портал PEdaily во саботата објави информации за можната временска рамка за излегувањето на компанијата на берза.

Од своето основање, компанијата работеше во сенка на попознати имиња, како што е „Дипсик“ (DeepSeek), кој уште во 2025 година ја разниша Силициумската Долина со својот моќен модел за вештачка интелигенција. Сепак, „Муншот“ остана меѓу лидерите во развојот на вештачката интелигенција во Кина, заедно со лабораториите „Квен“ (Qwen) на „Алибаба“ (Alibaba Group Holding), „Минимакс“ (MiniMax Group) и „Зет ВИ“ (Z.AI).

Bloomberg

Компанијата го почнала процесот на укинување на таканаречената „ред чип“ корпоративна структура, што е еден од условите за поедноставно котирање на акциите на странски берзи. Претставниците на „Муншот“ не одговориле на барањата за коментар надвор од работното време.

Пробивот на оваа компанија покажува колку брзо се развива кинеската трка во областа на вештачката интелигенција и колку ја надминала фазата на натпреварување исклучиво преку цената. Според анализата на „Артифишл Аналисис“ (Artificial Analysis), моделот Кими К3 го надминал Опус 4.8 на „Антропик“ (Anthropic) на поединечни напредни тестови, со што станал првиот кинески модел со јавно достапни параметри што постигнал таков резултат.

Bloomberg

Цената за користење на Кими К3 е поставена приближно на нивото на Сонет на „Антропик“, што покажува дека „Муншот“ верува дека може да наплатува премија во однос на другите кинески модели благодарение на квалитетот на својот производ.

Компанијата нуди претплатнички пакети за својот четбот, додека основната технологија за вештачка интелигенција ја продава и на деловни корисници. Неодамна претстави и универзален агент за вештачка интелигенција под името Кими ворк (Kimi Work). Сепак, обемот на нејзиното работење и натаму е помал од оној на „Зет ВИ“ (Z.AI), која е на пат да оствари една милијарда долари годишен приход.

„Муншот ВИ“ забрзано се движи кон излегување на пазарот на капитал во момент кога Пекинг ја засилува поддршката за домашниот развој на вештачката интелигенција. Кинескиот претседател Шји Џјинпинг го пофали напредокот на земјата во развојот на евтини решенија за вештачка интелигенција, повикувајќи на поотворен глобален технолошки поредок.

Во исто време, „Дипсик“ планира излегување на берза во 2027 година, додека паралелно преговара за нова рунда финансирање што би му обезбедила дополнителен капитал за развој на услуги за вештачка интелигенција и нивно глобално пласирање по цени значително пониски од оние на американските конкуренти.