Добивката на „Тесла“ падна поради инвестициите на Маск во ВИ

Добивката на „Тесла“ нагло падна и покрај силниот квартал во автомобилскиот бизнис, што дополнително влијае врз планот на главниот извршен директор Илон Маск вниманието на компанијата да го насочи кон вештачката интелигенција (ВИ) и роботиката.

Вложувањата во овие амбициозни проекти се зголемија на 5,8 милијарди долари во вториот квартал, поради што „Тесла“ првпат по две години забележа негативен паричен тек. Компанијата и натаму очекува капиталните инвестиции годинава да надминат 25 милијарди долари, додека раководството за следниот период најавува уште поголеми вложувања.

„Ова е година на огромни капитални инвестиции“, изјави Маск во средата вечерта за време на конференцискиот повик по повод објавувањето на кварталните резултати. „Треба да инвестираме во капитални проекти што е можно побрзо – онолку брзо колку што можеме, а притоа парите да не ги трошиме неефикасно.“

Акциите на „Тесла“ паднаа за 4,2 отсто во продолженото тргување на Волстрит, откако од почетокот на годината до затворањето на редовното тргување веќе изгубија 17 отсто.

Планираните инвестиции се наменети за значително проширување на производствените капацитети, вклучувајќи го производството на хуманоидниот робот „Оптимус“ (Optimus), развојот на технологии за ВИ, автономното возило „Сајберкаб“ (Cybercab) и проширувањето на флотата роботакси. „Тесла“ во последните години стави помал акцент на традиционалното производство на автомобили, иако продажбата закрепнува по двегодишниот пад.

Сепак, и покрај поголемата потрошувачка и најавите на Маск за дополнителни вложувања, капиталните инвестиции во вториот квартал и натаму се под нивото потребно компанијата да ја достигне овогодишната цел. Тоа укажува на сè поинтензивната трка во развојот на технологии за вештачка интелигенција (ВИ), во која дури ни драстичното зголемување на инвестициите можеби не е доволно за да се одржи чекор со конкуренцијата.

На пример, „Алфабет“ (Alphabet) во средата дополнително ја зголеми својата и онака амбициозна прогноза за капиталните инвестиции во 2026 година и ги извести инвеститорите дека тие би можеле да достигнат 205 милијарди долари, бидејќи е потребно да се обезбеди компјутерска инфраструктура за развој на системи за ВИ.

„Тесла“ е една од ретките компании што би требало да вложува уште повеќе во вештачката интелигенција“, изјави Макс Гокман, директор за ВИ и дигитални решенија во „Френклин Темплтон“ (Franklin Templeton). „Тоа што вложуваат помалку од очекуваното е прилично збунувачко, со оглед на тоа што нивната иднина во голема мера се заснова на примената на технологиите за ВИ во сите сегменти од работењето.“

Заработката под очекувањата, приходите над прогнозите

Според традиционалните финансиски показатели, кварталот беше нерамномерен. Прилагодената заработка по акција падна на 33 центи, значително под просечната процена на аналитичарите од 51 цент. Истовремено, „Тесла“ пријави негативен слободен паричен тек од 1,09 милијарди долари. Од друга страна, приходите достигнаа 28,2 милијарди долари, надминувајќи ги пазарните очекувања.

Резултатите доаѓаат неколку недели откако „Тесла“ објави дека во вториот квартал испорачала повеќе од 480.000 возила, што е значително над процените на аналитичарите. Сепак, автомобилите и натаму претставуваат основен извор на приходи на компанијата, додека услугите со роботакси и другите проекти поврзани со вештачката интелигенција засега не носат позначителни приходи.

Врз добивката негативно влијаеја пониските просечни продажни цени на возилата, бидејќи компанијата нудеше попусти и други поттикнувања за да привлече купувачи. Истовремено, „Тесла“ го запре производството на моделите С и Икс, своите најскапи автомобили, додека оперативните трошоци се зголемија за 47 отсто, на 4,35 милијарди долари.

Компанијата пријави и пад на приходите од регулаторните кредити, односно надоместоците што ги добива од други производители на автомобили кои не ги исполнуваат пропишаните стандарди за штетни емисии. Тој извор на приходи слабее откако администрацијата на претседателот Доналд Трамп се откажува од дел од целите во областа на чистата енергија што ги постави претходната администрација.

„Тесла“ го оствари најдобриот втор квартал во својата историја и првиот вистински раст на приходите по повеќе од една година, но пазарот се фокусираше на големото разочарување кога станува збор за добивката“, оцени Иван Фајнсет од „Тигрес“ (Tigress Financial Partners).

Како што наведе, продажбата на автомобили навистина силно пораснала, но тој раст е остварен благодарение на големите попусти, што ја намалило профитабилноста.

Расте бројот на корисници на системот Фул селф-драјвинг

Бројот на претплатници на софтверот на „Тесла“ Фул селф-драјвинг порасна на речиси 1,5 милиони, што е за 56 отсто повеќе отколку една година претходно.

„Тесла“ не објави нови цели за своите услуги со роботакси, кои по почетокот на работењето во Тексас се проширија и во Мајами, Орландо и Тампа, додека компанијата и натаму планира проширување во Феникс и Лас Вегас.

Истовремено, во областа на заливот на Сан Франциско, „Тесла“ нуди услуга за превоз преку истата апликација, но таа засега функционира според модел сличен на платформите „Убер“ (Uber) и „Лифт“ (Lyft), со присуство на возач.

Илон маск/Bloomberg Mercury

Раководството и натаму е претпазливо кога станува збор за проширувањето на услугите со роботакси. Маск нагласи дека безбедноста е апсолутен приоритет, како и избегнувањето негативен публицитет.

Директорот за ВИ во „Тесла“, Ашок Елусвами, изјави дека флотата автономни возила поминала повеќе од 380.000 милји без надзор од возач во шест градови, но не го откри вкупниот број возила. Тој додаде дека темпото на влегување во нови градови ќе се забрзува, иако аналитичарите сметаат дека тие податоци нема да бидат доволни за да ја намалат загриженоста на инвеститорите поради бавниот развој на услугата и нејзината способност да му конкурира на пазарниот лидер „Вејмо“ (Waymo), чии автономни возила поминуваат милиони милји секоја недела.

Компанијата наведе и дека собира дополнителни податоци за возењето на возилото „Сајберкеб“ (Cybercab), пред да започне неговата поширока употреба. Моделот, кој влезе во производство претходно оваа година, сè уште бара регулаторно изземање, но американската Национална управа за безбедност на сообраќајот на патиштата предложи измени на прописите што би можеле да го олеснат неговото излегување на пазарот.

Потпретседателот за развој на возила, Ларс Морави, изјави дека „Тесла“ има добра соработка со регулаторот и дека не очекува позначајни пречки на федерално ниво, додека Дејвид Вагнер од „Аптус“ (Aptus Capital Advisors) оцени дека инвеститорите сè помалку ја вреднуваат „Тесла“ исклучиво како производител на електрични автомобили.

„Сè повеќе ја гледаме како компанија за вештачка интелигенција и роботика. Нејзината долгорочна вредност зависи од комерцијалниот успех на системот Фул селф-драјвинг, „Сајберкаб“, хуманоидните роботи „Оптимус“ и високопрофитабилното работење со складирање енергија преку системите „Мегапак““, наведе Вагнер.

ИПО-то на „Спејс екс“ поттикна шпекулации за поврзување на компаниите

Во текот на вториот квартал се случи и еден од најзначајните настани за уште една компанија на Маск – „Спејс екс“ излезе на берза преку рекордна иницијална јавна понуда на акции (ИПО). Компанијата собра десетици милијарди долари, што накратко го направи Маск првиот светски билионер, иако акциите во последните недели ослабеа, намалувајќи ја и нето-вредноста на неговото богатство.

Меѓу инвеститорите веќе подолго време се шпекулира дека „Тесла“ и „Спејс екс“ во иднина би можеле да се спојат поради заедничките амбиции во областа на вештачката интелигенција. Маск призна дека активностите на двете компании сè повеќе се испреплетуваат, но нагласи дека за евентуално спојување не можел да зборува за време на конференцискиот повик посветен на резултатите на „Тесла“.

„Спејс екс“ во февруари веќе ја презеде компанијата за вештачка интелигенција на Маск, „екс-еј-ај“ (xAI), која сега работи под името „Спејс екс еј-ај“ (SpaceXAI). „Тесла“ и „Спејс екс“ веќе соработуваат и деловно – „Тесла“ на „Спејс екс“ ѝ испорачува батериски системи „Мегапак“ и возила „Сајбертрак“, додека четботот за ВИ „Грок“ е достапен во одделни автомобили на „Тесла“.

„Не можеме да зборуваме за спојување на компании и слични теми за време на конференциски повик за деловните резултати“, рече Маск. „Таквите работи мора да се спроведуваат преку соодветна процедура.“

Во подготовката на текстот помогна Џордан Фицџералд.