Кими К3 на „Муншот“ ќе биде бесплатно достапен за преземање

„Муншот“ (Moonshot AI) се подготвува својот модел Кими К3 (Kimi K3) да го направи достапен за јавно преземање, со што ќе го прошири своето влијание во глобалната заедница за софтвер со отворен код, во време кога во САД расте загриженоста поради продорот на кинеските компании во самиот врв на развојот на вештачката интелигенција.

Компанијата со седиште во Пекинг в понеделник треба да ги објави параметрите на моделот (model weights), кои се користат за насочување на системите за вештачка интелигенција при генерирањето одговори. Тоа ќе им овозможи на програмерите слободно да ја преземаат, приспособуваат и хостираат технологијата, со цел да се прошири базата на корисници на ВИ-моделите на „Муншот“. Основачот Јанг Џилин изјави дека сака да ги придобие корисниците преку поголема отвореност и поширока достапност во споредба со конкурентските американски затворени системи.

Првото претставување на Кими К3 и неговите резултати на споредбените тестирања предизвикаа распродажба на акциите на компаниите поврзани со вештачката интелигенција овој месец, бидејќи покажаа дека кинеските модели сè повеќе го намалуваат јазот зад американските лидери „Опен еј-ај“ (OpenAI) и „Антропик“ (Anthropic PBC).

Слично како и објавувањето на „Дипсик“ (DeepSeek) на почетокот на 2025 година, дебито на Кими К3 беше сфатено како доказ дека кинеските компании можат да го следат темпото на развој и со значително помал буџет и со помалку најсовремени ресурси од конкурентите што  имаат целосен пристап до ВИ-акцелераторите на „Енвидија“ (Nvidia Corp.).

Објавувањето на моделот в понеделник би можело да им донесе дополнителен бизнис на давателите на облачни услуги, специјализирани за хостирање модели со јавно достапни параметри. Во последно време кинеските ВИ-модели бележат нагол пораст на глобалната популарност, предводени од „Дипсик“, бидејќи нудат пониски цени и перформанси споредливи со американските решенија.

Како што претходно објави „Блумберг њуз“, дневната продажба на „Муншот“ се зголемила најмалку шестпати по дебито на Кими К3. Стартапот од Пекинг се обидува да го искористи тој замав додека подготвува нова инвестициска рунда, со проценета вредност од 50 милијарди долари, во пресрет на можна првична јавна понуда (ИПО) во Хонгконг уште оваа година.

Што вели „Блумберг интелиџенс“

Усвојувањето на големите јазични модели со јавно достапни параметри забрзува, но нивната комерцијализација ќе зависи од нивната дистрибуција преку најголемите даватели на облачни услуги. „Амазон АВС Бедрок“ (Amazon AWS Bedrock), „Мајкрософт Азур“ (Microsoft Azure Foundry) и „Гугл Вертекс ВИ“ (Google Vertex AI) сè уште не ги поддржуваат овие кинески модели со јавно достапни параметри, иако нивниот удел во вкупниот обем на обработени токени достигна 68 отсто по лансирањето на Кими К3 на „Муншот“ и ГЛМ-5.2 на „Зет ВИ“ (Z.AI).

- Мандип Синг и Вилијам Тонг, аналитичари на „Блумберг интелиџенс“

 

Успехот на „Муншот ВИ“ ја стави компанијата во центарот на технолошкото ривалство меѓу САД и Кина. Претставник на Белата куќа минатата недела ја обвини компанијата дека го обучувала моделот К3 со забранети чипови на „Енвидија“, а повторно ги актуализира и обвинувањата за т.н. дестилација - практика на недозволено извлекување резултати од водечките конкурентски модели за да се подобрат перформансите на сопствениот модел. „Муншот“ не одговори на барањата за коментар.

Компанијата го разви К3 со 2,8 трилиони параметри - приближна мерка за сложеноста на моделот - што го прави најголемиот модел со јавно достапни параметри во светот, во време кога водечките конкуренти, како „Антропик“, не ја откриваат големината на моделите како Клод (Claude).

К3 располага и со контекстен прозорец од еден милион токени, што му овозможува во едно барање да обработува исклучително обемни документи или програмски код. Иако самите параметри на моделот не откриваат многу информации разбирливи за луѓето, „Муншот“ најави дека во претстојниот технички извештај ќе објави дополнителни детали за архитектурата, процесот на обучување и резултатите од споредбените тестирања.