„Нетфликс“ плаќа 200 милиони долари за пренос на СП за жени во 2027 година

„Нетфликс“ (Netflix Inc.) ќе плати 200 милиони долари за телевизиските права за Светското првенство во фудбал за жени следната година, според лица запознаени со договорот, кои побарале да останат анонимни бидејќи не се овластени јавно да зборуваат за деталите.

Стриминг-сервисот претходно објави дека ги обезбедил правата за пренос на натпреварите во САД и Канада за турнирите во 2027 и 2031 година. Но, финансиските детали досега не беа објавени.

„Нетфликс“ одби да го коментира договорот. Од ФИФА не одговорија веднаш на барањето за коментар. Не е познато колку „Нетфликс“ платил за турнирот во 2031 година.

ФИФА се обидува да ја зголеми комерцијалната вредност на своите турнири. Најновиот чекор вклучува план комерцијалните права да бидат префрлени во посебен ентитет, а удели во него да им бидат понудени на инвеститори. Таквиот потег предизвика критики, од политичари до УЕФА, европската фудбалска организација.

За Светското првенство во фудбал за жени во 2023 година, ФИФА првпат ги продаде телевизиските права одвоено, во период кога интересот за женскиот спорт нагло растеше. Годишниот извештај на ФИФА за таа година покажа приходи од околу 270 милиони долари од телевизиски права, во кои се вклучени медиумските договори за Светското првенство во фудбал за жени на сите пазари.

Износот што „Нетфликс“ ќе го плати за турнирот во 2027 година, кој ќе се одржи во Бразил, го прави овој договор еден од најголемите медиумски договори на годишно ниво во женскиот спорт. Договорот на ЖНБА (WNBA-Женската национална кошаркарска асоцијација) вреден 3,1 милијарда долари за период од 11 години се смета за најголем и во просек изнесува околу 280 милиони долари годишно.

За Светското првенство во фудбал за мажи во 2026 година, „Фокс“ (Fox) плати околу 485 милиони долари за телевизиските права за САД.

ФИФА очекува следното Светско првенство во фудбал за жени да донесе двојно поголеми приходи, односно околу една милијарда долари, изјави главната директорка за фудбал на ФИФА, Џил Елис, во емисијата „Договорот“ (The Deal) во јуни.

Во 2023 година, претседателот на ФИФА, Џани Инфантино, ги повика радиодифузерите да платат фер цена за медиумските права за Светското првенство во фудбал за жени и ги критикуваше понудите како премногу ниски.

Инфантино во 2023 година се закани со затемнување на телевизискиот сигнал на европските пазари бидејќи радиодифузерите одбиваа да платат повеќе. Европската радиодифузна унија постигна договор со ФИФА само неколку недели пред почетокот на турнирот.

Европската радиодифузна унија и ФИФА веќе постигнаа договор со 19 јавни радиодифузери за пренос на натпреварите од Светското првенство во фудбал за жени во 2027 година. Финансиските детали од договорот не се објавени.