Големи хеџ-фондови од Волстрит нападнати од хакери

Хакери започнале бран софистицирани напади врз фирмите на Волстрит во последните денови, таргетирајќи ги информациските системи кај големите инвестициски фондови, според луѓе запознаени со ова прашање.

„Поинт 27 Асет Менаџмет“ (Point72 Asset Management) ги информираше инвеститорите во среда дека биле нападнати, иако првичните индикации на хеџ-фондот беа дека не се украдени информации за клиентите, според едно од лицата, кое побара да не биде именувано.  Фирмата им кажала на инвеститорите дека сè уште го разгледува инцидентот, рече лицето.

Напаѓачите, исто така, се обиделе да се инфилтрираат во информациските системи на други големи хеџ-фондови, вклучувајќи ги „Милениум Менаџмент“ (Millennium Management), „Ту Сигма Инвестментс“ (Two Sigma Investments) и „Ситадел“  (Citadel), како и неколку помали фирми за менаџирање капитал, како дел од нападот, рекоа луѓето.

Главниот извршен директор на „Поинт 72“, Стив Коен. Извор: Getty Images North America

 

Нападот вклучувал гласовен фишинг, или вишинг (vishing), во кој сајбер-криминалците користат технологија за имитирање гласови во телефонски повици или пораки за да ги измамат вработените да откријат чувствителни информации или да овозможат пристап, рекоа луѓето, барајќи да не бидат именувани, дискутирајќи за чувствителни информации што не се јавни.

„Ту Сигма“, која менаџира средства во вредност од 75 милијарди долари, рече дека го спречила обидот за пристап до чувствителни податоци.

„Нашиот тим за безбедност брзо реагираше на обид за кампања за вишинг насочена кон Ту Сигма и други инвестициски компании, и немаме индикации за какво било влијание врз нашите податоци или нашите системи“, изјави портпаролот на фирмата во соопштението. „Продолжуваме внимателно да ја следиме ситуацијата.“

Портпаролите на „Милениум“, „Поинт 72“ и „Ситадел“ одбија да коментираат.

Ударите врз сајбер - безбедноста на Волстрит се зголемија во текот на изминатата година, бидејќи алатките за вештачка интелигенција им помагаат на злонамерните актери да започнат напади релативно евтино и распространето, рече Винод Пол, претседател на „Алајн Мениџд Сервисес“ (Align Managed Services), која е специјализирана за помагање на хеџ-фондови со сајбер-безбедност и информатичка технологија.

„Порано можеа да нападнат 50 субјекти во насочен напад, сега можат да загрозат 1.000“, рече Пол. „Хакерите исто така можат да слушаат телефонски повик и да го имитираат гласот, тонот и фразите на говорниците за да создадат лажни повици.“

Во јуни, единицата за сајбер-безбедност во „Гугл“ објави блог пост во кој забележува за бран напади оваа година против адвокатски фирми и други компании за професионални услуги.

Овие напади, исто така, вклучуваа техники на вишинг, а дури во некои случаи вклучуваа и лица кои влегуваа во корпоративни канцеларии претставувајќи се како ИТ работници, се вели во објавата.

Шефот на „Ситадел“, Кен Грифин. Извор: Блумберг

 

Регулаторната управа за финансиска индустрија - Финра, која ги надгледува професионалците во овој сектор, беше во контакт со фирмите-членки во врска со неодамнешните обиди за упад, според посебно лице запознаено со ова прашање.

Финра го стартуваше Центарот за фузија на финансиското разузнавање во март - безбедносен портал за Финра и нејзините фирми-членки за споделување разузнавачки информации околу заканите од измама и за помош при координирање на одговорите. Тоа беше одговор на сè пософистицираните сајбер и измамнички закани што беа насочени кон фирмите за финансиски услуги.

Портпаролот на Финра одби да коментира.

Инцидентите го истакнуваат растечкиот ризик дека измамниците или злонамерните држави држави ќе ги искористат најсовремените технологии за да ги зголемат нападите, понекогаш барајќи откуп за да отклучат податоци или системи. Во случајот на Волстрит, тоа може да влијае на фирмите и пазарите што ракуваат со трилиони долари во дневни трансакции. Иако можеби не се поврзани, неодамнешниот бран напади се одвиваше додека американските власти се тркаа и да ги ограничат сајбер- нападите врз водоводните системи во неколку држави што предизвика загриженост за потенцијални врски со Иран.

Со децении, финансиската индустрија се извлекуваше со лабави софтверски практики бидејќи вештината и знаењето за извршување напади беа специјализирани и ретки, според Вил Вилсон, главен извршен директор на „Антитезис“ (Antithesis), која им помага на компаниите да пронајдат и поправат ИТ ранливости.

„Застрашувачката работа кај современите системи со вештачка интелигенција е тоа што тие овозможија извршување напади во голем обем“, рече тој. „Сите ќе мора сериозно да се издигнат на ниво за да парираат. Инаку ќе бидат во големи проблеми.“