Одговорната за Pay и Wallet во „Епл“ заминува во пензија

Џенифер Бејли од „Епл“ (Apple Inc.), долгогодишна раководителка на услугите за плаќање „пеј“ (Pay) и „волет“ (Wallet), се пензионира по повеќе од две децении во компанијата, што значи голема промена во топ менаџментот на компанијата производител на „ајфон“.

Шефот на секторот за услуги  на „Епл“, Еди Кју, го објави нејзиното заминување во меморандум за персоналот што го виде „Блумберг Њуз“. Бејли, која е потпретседател на „Епл Пеј“ (Apple Pay) од неговото лансирање во 2014 година, заминува во октомври, рече тој.

„Под водство на Џенифер, ‘Епл Пеј’ го промени начинот на кој стотици милиони наши корисници плаќаат“, рече Кју. „Пред заминувањето на Џенифер на крајот на октомври, ќе го објавиме нашиот план за наследување, а Џенифер ќе продолжи да биде достапна за поддршка на транзицијата во советничка улога.“

Портпаролот на „Епл“ со седиште во Купертино, Калифорнија, одби да коментира.

„Епл Пеј“, услуга за плаќање што им овозможува на луѓето да купуваат лично и преку интернет, стана една од најпрофитабилните понуди на компанијата. Таа генерира приходи од повеќе од 7,5 милијарди долари годишно, според проценките на аналитичарите собрани од „Блумберг“, и служи како клучна причина зошто луѓето се држат до своите „ајфони“.

Заминувањето на Бејли се смета за голема загуба во „Епл“, според луѓе запознаени со оваа промена. И постои свест дека тоа ќе наговести поширок егзодус на високи менаџери во нивните 60-ти години, рекоа тие.

„Епл“ се соочува со демографски предизвик: Генерација на извршни директори, кои станаа вистински богаташи за време на нивните децении во технолошкиот гигант, сега достигнуваат возраст за пензионирање во исто време и повеќе не мора да работат.

Долгогодишната генерална советничка Кејт Адамс се пензионира оваа година, а шефицата за животна средина Лиза Џексон замина на почетокот на 2026 година. Поранешниот главен финансиски директор Лука Маестри и долгогодишниот шеф за маркетинг Фил Шилер останаа во компанијата со помали задачи, но се многу блиску до крајот на своите мандати.

Извршниот тим на „Епл“ вклучува неколку други ветерани лидери кои се приближуваат кон традиционалната возраст за пензионирање. Кју во одделот за услуги, шефицата за малопродажба Деирдре О'Брајан и шефот за маркетинг Грег Џосвијак се во „Епл“ околу четири децении.

Најзначајната промена се однесува на Тим Кук, кој се повлекува од функцијата извршен директор на 1 септември. Тој ќе биде заменет од Џон Тернус, раководител на одделот за хардвер на компанијата.

Се очекува Тернус, 51, да направи свои прилагодувања како извршен директор, вклучително и понатамошни промени во персоналот. Неодамна ангажираше пензиониран лидер за хардвер да се придружи на неговиот менаџерски тим.

Џош Розенсток, виш директор за корпоративни комуникации кој работеше на финансиски и политички односи со јавноста, исто така си заминува,  неповрзано со веќе споменатите промени.

Одделот за плаќање на Бејли беше во центарот на продорот на „Епл“ во областа на финансиските услуги. Апликацијата „пеј“ помогна во создавањето на понови понуди, како што се „Епл Кард“ (Apple Card), и неодамна објавената програма за претплата за надградба на уреди на компанијата.

Апликацијата „волет“ (Wallet или паричник, превод од анг.), исто така под надзор на Бејли, започна главно како место за дигитално складирање на кредитни и дебитни картички, но се прошири и во други области. Сега може да содржи виртуелни клучеви за домови, автомобили и хотели, како и лични карти.

Пред да помогне во лансирањето на „Епл Пеј“, Бејли беше потпретседателка задолжена за онлајн продавницата на компанијата. Таа се приклучи на „Епл“ на почетокот на 2000-тите, откако работеше во низа интернет компании.

Бејли е познато лице за фановите на „Епл“, кои ги гледаа презентациите на она што денеска претставуваат “пеј“ и „волет“ на главни корпорациски настани низ годините. Таа е исто така една од најискусните и највлијателните жени раководители во „Епл“ за време на нејзиниот мандат.