Самсунг им враќа на акционерите околу 80 милијарди долари

„Самсунг Електроникс“ (Samsung Electronics) планира да врати до 110 билиони вони (80 милијарди долари) на инвеститорите оваа година, придружувајќи се на „СК Хајникс“ во споделувањето на добивките од бумот на вештачката интелигенција (VI). Компанијата ја започнува најголемата програма за враќање на капиталот на акционерите во историјата на Јужна Кореја.

Во третиот квартал, се очекува да бидат исплатени приближно 30 билиони вони преку дивиденди, а „Самсунг“ исто така планира да ги откупи своите акции во вредност од околу 15 билиони вони за награди на вработените. Компанијата сè уште не прецизирала како ќе се распредели преостанатиот дел од планираниот износ.

Програмата на „Самсунг“ за награда на акционерите се рангира како една од најголемите досега. За споредба, „Епл“ одобри откуп на сопствени акции од 110 милијарди долари во 2024 година, најголемата таква програма во САД дотогаш . Сепак, „Самсунг“ не прецизираше во петокот колку од планираниот износ ќе се искористи за откуп на сопствени акции.

„Самсунг“ изјави дека преостанатите плаќања на акционерите конечно ќе бидат дефинирани на состанокот на одборот на директори во јануари. Сепак, таа изјава разочара дел од инвеститорите, па акциите на „Самсунг“  паднаа за дури 2,6 проценти во тргувањето по затворањето на берзата. Јужнокорејскиот вон зајакна во петокот, забележувајќи раст и  до еден процент.

„Некои инвеститори неодамна очекуваа програмата за поврат на капиталот да биде до 150 билиони вони, што ја објаснува реакцијата на акциите по затворањето на берзата“, рече Ким Минџи, менаџер за портфолио во „Маст Асет Менаџмент“ (Must Asset Management).

Потезите на овие двајца добавувачи на меморија за компанијата „Енвидија“ - во исто време клучни архитекти на ширењето на вештачката интелигенција, се одговор на зголемениот притисок од инвеститорите да делат повеќе од парите генерирани од овој бум.

Планот на компанијата „СК Хајникс“ (SK Hynix) да откупи 40 билиони вони од сопствените акции го зголеми притисокот врз „Самсунг“ да врати повеќе пари на акционерите, кои укажуваат на растечките парични резерви на технолошкиот гигант. Очекувањата за голема програма за враќање за инвеститорите ги зголемија акциите на „Самсунг“ оваа недела.

„Ова би можело да предизвика поширока структурна промена на целиот корејски пазар на капитал“, рече Том Канг, директор за истражување во „Каунтерпоинт“ (Counterpoint). „Веруваме дека ова е важен чекор кон корпоративно управување фокусирано повеќе на акционерите, многу послично на моделот што вообичаено се гледа на американскиот пазар.“

Приоритетните акции на „Самсунг“ пораснаа за повеќе од осум проценти пред објавата во петокот. Растот веројатно беше поттикнат од очекувањата за поголем поврат на капиталот за акционерите и повисоки дивиденди за имателите на приоритетни акции. Според Алберт Јонг од „Петра Капитал Менаџмент“ (Petra Capital Management), тие акции претходно се тргуваа со „значаен попуст“, односно по значително пониска цена во споредба со обичните акции.

„Клучното прашање е колку од овој износ претставува дополнителен поврат за акционерите и колку ќе се исплати преку откуп на акции, а колку преку дивиденди“, рече тој.

 

Bloomberg

 

„Инвеститорите сега ќе бидат повеќе загрижени за тоа како ќе се врати преостанатиот капитал отколку за објавениот износ“, рече Јунг Ин Јун, извршен директор на „Фибоначи Асет Менаџмент Глобал“ (Fibonacci Asset Management Global). „Тие ќе бидат особено заинтересирани за тоа колкав дел ќе биде насочен кон купување и поништување  на акции, а колку кон вонредни дивиденди.“

-Со помош на Дени Томас, Влад Савов и Ник Тарнер.