Трансакција тешка една милијарда евра: „Римац Група“ презеде целосна контрола врз „Бугати Римац“

Во рамките на трансакцијата најавена во април 2026 година, конзорциум предводен од „ХОФ Капитал“ (HOF Capital), во кој „БлуФајв Капитал“ (BlueFive Capital) е најголемиот инвеститор, ги презеде уделите на „Порше“ (Porsche) во „Римац Група“  и „Бугати Римац“ (Bugatti Rimac). Трансакцијата сега е официјално завршена, нејзината вредност е околу една милијарда евра и е целосно финансирана од конзорциумот.

За потсетување, „Порше“ и „Римац Група“ го основаа „Бугати Римац“ во 2021 година како заедничко вложување (joint venture), во кое „Римац Група“ беше мнозински сопственик на 55 проценти од капиталот што сè уште го држи денес, додека „Порше“ ги имаше преостанатите 45 проценти. „Порше“, исто така, поседуваше 20,6 проценти од капиталот во „Римац Група“.

Мате Римац, извршен директор на „Римац Група“, изјави дека ова е важен чекор за „Бугати Римац“ и целата групација. „Задоволен сум што ХОФ Капитал и нивниот конзорциум стануваат наши партнери во следната фаза од развојот на нашата група и со нетрпение очекувам да соработуваме за да го реализираме целосниот потенцијал на нашите компании. Направивме силен напредок и верувам дека ова партнерство обезбедува дополнителен импулс за наш уште посилен развој“, рече тој.

Промени во менаџментот на „Бугати Римац“

Римац во новиот развоен период ќе го поддржува нов менаџерски тим. Кристоф Пиошон ќе отстапи од функцијата претседател на управата на „Бугати Автомобили“ (Bugatti Automobiles) и главен оперативен директор на „Бугати Римац“.

Мате Римац ќе ја преземе функцијата извршен директор на „Бугати Автомобили“, додека Марко Бркљачиќ, поранешен извршен директор во „Римац Технологија“ (Rimac Technology), ќе се придружи на раководството на „Бугати Римац“ како извршен директор.

Планирани се понатамошни промени во блиска иднина, вклучително и назначувањето на сегашниот извршен директор на „Бугати Автомобили“ , Хендрик Малиновски, за главен комерцијален директор.

„Во текот на повеќе од две децении во ‘Бугати”, Кристоф имаше длабоко влијание врз развојот на компанијата каква што ја знаеме денес. Од „Вејрон“ (Veyron) до „Турбилон“ (Tourbillon), неговата работа придонесе за градење и одржување на квалитетот што ги дефинира сите хипер-автомобили на ‘Бугати’. Во име на целиот тим на ‘Бугати Римац’ (Bugatti Rimac), би сакал да му се заблагодарам на Кристоф и да му посакам многу успех, а исто така би сакал да ја искористам оваа можност да му посакам добредојде на  Марко“, рече Мате Римац.

Новите менаџерски назначувања доаѓаат во клучен момент за „Бугати“: новиот производствен погон „Ла Мануфактур“ (La Manufacture) во Молсхајм беше отворен во јули, а Турбилон влегува во својата последна фаза на тестирање.