.webp){kind=icon}
Деветмина најдобри студенти во четврта година на Економскиот факултет при УКИМ во Скопје ќе добијат стипендии од осигурителни компании.
Оваа новост ја предвидува трипартниот Меморандум за соработка што денеска, на Националниот ден на осигурувањето - 1 ноември, на Економскиот факултет, го потпишаа проф. д-р Крсте Шајноски претседател на Советот на експерти на Агенцијата за супервизија на осигурување (АСО), проф. д-р Предраг Трпески, декан на Економскиот факултет и Ѓорѓе Војновиќ, претседател на Здружението на финансиски организации при СКСМ, кој воедно е и генерален директор на „Триглав Осигурување“.
Иницијативата на АСО за стипендирање на студенти доби поддршка од Економскиот факултет и беше прифатена од девет осигурителни компании: „Триглав Осигурување“, „Кроација осигурување – неживот“, „Еуролинк“, „Граве Неживот“, „Халк Осигурување“, „Евроинс“, „Сава Осигурување“, „Кроација осигурување – живот“ и „Граве“. Секоја од компаниите ќе додели по една годишна стипендија во денарска противвредност од 1.000 евра.
Шајноски потенцираше дека е задоволен од одзивот на компаниите на иницијативата на АСО за стипендирање студенти и дека со тоа учесниците на осигурителниот пазар покажале високо ниво на општествена одговорност.
„Ние сме овде за вас! Затоа што вие сте најквалитетната долгорочна осигурителна полиса за сите нас. Вие апсолутно го заслужувате нашето целосно внимание, грижа и посветеност затоа што вие, студентите, сте иднината на нашата земја“, порача Шајноски.
Деканот Трпески појасни дека согласно со меморандумот студенти од Економскиот факултет ќе отпочнат да реализираат практична настава во Агенцијата за супервизија на осигурувањето, Здружението на осигурители и останатите осигурителни компании кои оперираат на националниот осигурителен пазар и да се стекнат со нови знаења, но и можност за вработување во овој сектор.
Со тоа, посочи Трпески, им се отвора перспективата да бидат активни учесници во идниот развој на осигурителниот пазар во земјава.
Исто така, претставници на институции од осигурителната индустрија активно ќе се вклучат со практични примери во наставата на Економскиот факултет - Скопје и ќе пренесат практични знаења на студентите. Економскиот факултет - Скопје активно ќе се вклучи во надградбата на националната осигурителна култура, како еден од факторите за креирање на поволно бизнис окружување и поттикнување на инвестициите во македонската економија.
Активностите за одбележување на националниот ден на осигурувањето опфатија и две панел дискусии за актуелни теми поврзани со растот и развојот на осигурувањето како и за предизвиците кои врз оваа дејност ги наметнува инфлацијата предизвикана од глобалните растечки цени пред се на енергенсите, како и за заштита на правата на осигурениците која е основа за раст на културата на осигурување.
Во рамки на настанот беше презентиран и наградениот научно-истражувачки труд од областа на управување со ризици и осигурување за кој АСО, традиционално низ годините, доделува награда. Автор на наградениот труд, годинава, е младиот научник м-р Филип Пеовски, асистент на катедрата по математика и статистика на Економскиот факултет при УКИМ во Скопје. На настанот Шајноски на Пеовски, во име на АСО, му додели плакета и награда од 80.000 денари.
Први ноември е национален ден на осигурувањето, а воедно е и денот на кој, пред 13 години почнала со работа Агенцијата за супервизија на осигурувањето. АСО е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.
