.webp){kind=icon}
Акциите на „Пејпал“ (PayPal Holdings Inc) паднаа откако компанијата ја намали прогнозата за своите годишни приходи во услови на забавен раст на потрошувачката на нејзината платформа. Опсегот на платформата „Пејпал“ порасна за 14 проценти, на 337 милијарди долари во третото тримесечје годинава, промашувајќи ги процените на аналитичарите, кои предвидуваа 343,2 милијарди долари.
Од „Пејпал“ соопштија дека сега очекуваат раст на приходите за оваа година за 10 проценти, на 27,5 милијарди долари, што е помалку во споредба со претходното предвидување од 27,85 милијарди долари.
„Јасно е дека се гледа дискрециска потрошувачка, која е под притисок, бидејќи луѓето трошат сѐ повеќе и повеќе од своите расположливи приходи за гас, храна и домување“, рече главниот извршен директор Ден Шулман. Тој се бори со забавениот раст на потрошувачката на многубројните платформи на „Пејпал“, поттикнат од повторното отворање на американската економија по пандемијата, како и од нивото на инфлација што се јавува еднаш во неколку децении.
Акциите на „Пејпал“ паднаа за околу 6,9 проценти во претходните две тргувања на берзите. Сепак, акциите вратија дел од својата претходна загуба откако „Пејпал“ најави договор со „Епл“. Како одговор на тоа, компанијата вети намалување на трошоците, вклучувајќи намалување на работните места и затворање на канцеларии низ земјата, што ќе резултира со заштеда од 900 милиони долари оваа година и 1,3 милијарда долари идната година.
Шулман зборуваше за своите планови за подобрување на оперативните работи, односно можноста приходите да растат побргу од трошоците. Трошоците за третото тримесечје се покачија на 5,73 милијарди долари, значајно под просечната процена од 5,92 милијарди долари, колку што предвидуваа деветте аналитичари на „Блумберг“.
Компанијата сега очекува дека притисокот за намалување на трошоците ќе ја зајакне добивката годинава, иако е намалена прогнозата за годишните приходи.
„Остваривме силни резултати во третото тримесечје. Ќе продолжиме да инвестираме во согласност со нашите клучни приоритети за да ја унапредиме нашата водечка позиција во дигиталните плаќања и трговијата“, рече Шулман кога ги објави корпоративните финансиски резултати.
Приходите во третото тримесечје пораснале за 12 проценти, на 6,85 милијарди долари. Тоа е повеќе од предвидувањата на аналитичарите од 6,81 милијарди долари, а „Пејпал“ рече дека сега очекува дека добивката ќе изнесува дури 4,09 долари по акција, што е пораст од 3,97 долари, колку што се очекуваше претходно.
