Не само што тој е сопственик на половина од најголемата компанија за енергетски пијалоци во светот и два тркачки тима во Формула 1, Марк Матешиц е и најбогатиот миленијалец во Европа.
30-годишниот Австриец, кој наследи 49 отсто од акциите во Ред Бул по смртта на неговиот татко Дитрих, сега има богатство од 15,7 милијарди долари, според индексот на милијардери на Блумберг. Новиот сопственик го означува почетокот на новата ера за Ред Бул, производителот на сеприсутниот пијалок со кофеин.
Во текот на изминатите четири децении, Дитрих Матешиц ја искористи популарноста на својот пијалок за да изгради спортска маркетинг империја која опфаќа сè, од фудбал до авто-трки и планински велосипедизам.
Матешиц, кој беше задолжен за органските пијалоци на Ред Бул, направени со природни состојки, сега како и неговиот татко планира да се фокусира на улогата на сопственик наместо да помага во секојдневните операции на компанијата, им пиша на вработените во писмото во петокот.
Тројца директори кои работеа во Ред Бул за време на животот на Дитрих Матешиц поднесоа оставка како дел од реконструкцијата на менаџментот. Тие ќе продолжат да работат како консултанти на компанијата, која е сопственик и на германскиот фудбалски клуб РБ Лајпциг. Компанијата му исплати на Дитрих рекордни 866 милиони евра дивиденда за инатогодишните резултати. Двајца од нив ќе работат директно со Марк како директори на холдинг компанијата за Ред Бул.
„Тие ќе го поддржат не само Управниот одбор, туку и сите нас, за успешно да ја продолжиме работата на татко ми, како што тој би сакал“, вели во писмото Матешиц, кој сега е најбогатиот Австриец.
Портпаролот на Ред Бул, кој е со седиште во близина на Салцбург, не одговори на барањето за коментар. Дитрих Матешиц го основал Ред Бул во 1984 година со тајландскиот претприемач Чале Јоовидја, откако за време на патувањето во Азија открил дека пијалоците со кофеин го ублажуваат проблемот кој настанува при менување на временските зони.
Семејството Yoovidhya го контролира остатокот од бизнисот и е меѓу најбогатите во Азија. Како што растело неговото богатство, Дитрих Матешиц го купил островот Фиџи и замоци и вили во неговата татковина, кои не подлежат на данок на наследство. Минатата година тој купи имот во лондонскиот кварт Најтсбриџ за 32 милиони фунти (37 милиони долари), кој сега е дом на модниот бренд AlphaTauri на Ред Бул. Неговиот единствен син, Марк студирал бизнис менаџмент на Универзитетот за применети науки во Салцбург. Уште од мал го следел татко му во неговите активности, уште како момче одел на трки во Формула 1.
Пред смртта на татко му, Марк, заедно со него, веќе поседувал акции во компанија која инвестирала во недвижен имот во Австрија, вклучително и имот што имал хелиодром и лозје.
Пред четири години тој започна со производство на пиво и лимонада користејќи вода од еден од најстарите извори во Австрија. Не беше објавено дали Матешиц наследува други средства од својот татко, кој според индексот на богатството на Блумберг, во изминатата деценија добил дивиденди од над 2 милијарди долари од Ред Бул. Матешиц, исто така, седи во одборот на фондацијата за истражување на 'рбетниот мозок, основана од неговиот татко и раководена од неговата мајка, Анита Герхардтер.
Оставката од сегашната позиција во Ред Бул не беше лесна одлука, напиша Матешиц во писмото. Иницијативата за производство на органски пијалоци, изјави тој, „отсекогаш ми била проект многу близок на срцето“.
.webp){kind=icon}
