.webp){kind=icon}
Кредит Суис (Credit Suisse Group AG) предупредува дека во четвртото тримесечје ќе забележи загуба од 1,5 милијарда швајцарски франци, односно околу 1,6 милијарда долари, и известува за натамошен одлив на средствата за управување со имоти, главно поради падот на довербата од клиентите.
Акциите паднаа за 2,6 проценти во денешното тргување, што е под рекордно ниското ниво постигнато на крајот од септември.
Банката со седиште во Цирих во средата објави дека очекува загуби во секторот за управување со имоти и во својот оддел за инвестициско банкарство поради придушените активности, пазарните услови, континуираниот одлив на средства од клиентите и продажбата на споредните бизниси.
Заемодавецот рече дека од 11 ноември нето-одливот на средства изнесува околу шест проценти од имотот што го има под управување на крајот од третото тримесечје. Тоа е еквивалентно на приближно 84 милијарди швајцарски франци, или 88,25 милијарди американски долари, во одлив преку управување со богатството и имотите.
Кредит Суис поминува низ целокупна ревизија, во која ќе се подели нејзината инвестициска банка и ќе се стави поголем фокус на приватното банкарство по година на скандали и грешки во управувањето. Подоцна во текот на денов ќе се бара одобрение од акционерите за зголемување на капиталот од околу четири милијарди франци, односно 4,2 милијарди долари, а банката има намера да го намали бројот на вработени за околу 9.000 до 2025 година.
„Огромните нето-одливи во 'Велт менаџмент' се длабоко загрижувачки, дури уште повеќе загрижува тоа што уште не се случил пресврт. Кредит суис мора да ја врати довербата што е можно поскоро, но секако дека тоа е многу полесно да се каже отколку да се направи“, вели Андреас Вандити, банкарски аналитичар во Банк Вонтобел (Bank Vontobel) во Цирих.
„Вистинските резултати ќе зависат од бројот на клиенти, вклучувајќи ги и преостанатото работење до крајот на годината, излегувањето со независна позиција и исходот од другите продажби на имотите“, велат од банката.
Банката минатиот месец предупреди дека може да очекува загуба во четвртото тримесечје, а главниот извршен директор Улрих Кернер рече дека дефинитивно ќе биде профитабилна во 2024 година.
„Се очекува дека пониските депозити и намаленото управување со имотите негативно ќе влијаат на нето-каматните приходи на банката“, наведуваат од банката.
Одливите во управувањето со имотот значајно се намалија во однос на зголеменото ниво во првите две недели од октомври, иако изнесуваат приближно 10 проценти од имотот под управување на крајот од третото тримесечје, како што забележуваат од банката.
Исто така, во четвртото тримесечје се очекуваат и трошоци за реструктурирања и намалување на вредностите на софтверот и недвижностите во износ од 250 милиони швајцарски франци, односно 262,65 милиони долари.
