text size
Новата регулатива на Европската Унија (ЕУ) што се однесува на дополнителна давачка за емисијата на јаглероден диоксид при производството ќе почне од 2026 година, но од 1 јануари 2023 година ќе започне транзицискиот период во кој компаниите ќе имаат обврска да ја пријавуваат емисијата на CO2, а засега не и да плаќаат за тоа загадување. Златко Ветеровски од Царинската управа, во гостување на Блумберг Адрија ТВ, го објаснува детално процесот на имплементација на новата европска регулатива.
„ЕУ усвои нова регулатива што се однесува на популарно наречената јаглеродна давачка. Разликата е што со новата регулатива пет категории производи ќе подлежат на тој мониторинг, односно на евентуална наплата на таа јаглеродна давачка. Која е разликата од сега и тоа што ќе биде од 1 јануари 2023 година? Во системот доколку компанијата не наплаќа данок во земјата каде што е производството, таа давачка ќе биде наплатена при увоз во некоја од земјите од ЕУ. Оваа регулатива опфаќа пет производи: производите од железо и челик, производите од алуминиум, вештачките ѓубрива, цементот и електричната енергија. За компаниите тоа ќе значи дека во еден транзициски период од три години компаниите ќе имаат обврска само да искажуваат колку е тој систем за CO2, а од 1 јануари 2026 година и да ја плаќаат таа јаглеродна давачка“, вели Златко Ветеровски од Царинската управа.
Од 1 јануари 2023 година македонските компании што извезуваат на пазарите во земјите-членки на ЕУ ќе мора да го искажуваат нивото на CO2 што е вградено во нивните производи.
„Во тој период на приспособување ЕУ ќе донесе и низа правилници врз основа на усвоената регулатива и ќе ја утврди висината на цената што ќе треба да се плаќа. За овие три години транзициски период, ова ќе биде само една практична вежба со која компаниите ќе увидат колкаво е нивото на CO2 интегрирано во нивните производи“, вели Ветеровски.
Златко Ветеровски од Царинската управа е гостин во вториот дел од емисијата „Зум ин“ на Блумберг Адрија ТВ. Видеото од целата емисија е во прилог на овој текст.
.webp){kind=icon}
