.webp){kind=icon}
Германскиот авиопревозник „Луфтханза“, влегува на македонскиот авијациски пазар со отпочнување на летови на линијата Франкфурт – Скопје, од 23-ти април 2023 година, соопшти „ТАВ Македонија“, откако авиокомпанијата ги закажа летовите помеѓу двата града.
„Луфтханза“ ќе ги поврзе македонскиот главен град со главниот аеродром во Франкфурт нудејќи летови од Меѓународниот аеродром Скопје секој ден во неделата, а во некои денови ќе лета по два пати дневно со авиони од видот: Airbus A319, Airbus A320 и Airbus A321.
„Среќни сме што „Луфтханза“ одлучи да влезе на македонскиот пазар, со отпочнување на летови на релација Франкфурт – Скопје. Ова значи дека Меѓународниот аеродром Скопје од април следната година ќе биде поврзан со аеродромот во Франкфурт, кој е главното германско авијациско седиште и еден од најважните трансфер-аеродроми во Европа“, изјави Метин Батак, генерален директор на „ТАВ Македонија“.
Тој додава дека честата фреквенција на летовите ќе даде одлична флексибилност за патниците кои патуваат за Германија и оние што се поврзуваат со Европа и Северна Америка.
„Оваа нова конекција е особено важна за патниците кои патуваат за бизнис-цели и ќе понуди нови опции за авионскиот карго-превоз кон Германија, која е главен трговски партнер на Македонија. Влезот на групацијата „Луфтханза“ е резултат на континуираните маркетиншки активности на ТАВ, се со цел да привлече нови авиокомпании и да ги убеди да отворат нови дестинации од македонските аеродроми. Одлично е што нашата мрежа на авиолинии ќе се прошири и веруваме дека „Луфтханза“ ќе додаде на вредноста на услугите што им ги нудиме на нашите патници од Меѓународниот аеродром Скопје“, вели Батак.
Како што велат од „Луфтханза“, летовите на релација Франкфурт-Скопје се планирани да бидат привлечни и за деловните патници и за туристите. Германскиот авиопревозник го додава Скопје во својата мрежа на линии од летната сезона во 2023 година со цел да ја зајакне својата позиција во Источна Европа.
Продажбата на авиобилетите е веќе почната, а сите информации за цени и резервации на авионските карти се достапни на веб-страницата на Луфтханза, како и кај лиценцираните туристички агенции кои вршат продажба на авиобилети.
Инаку, „ТАВ Македонија“ ги заврши 11-те месеци од 2022 година со 2,2 милиона (2.190.352) патници на двата македонски аеродроми, што е зголемување за 74 проценти во споредба со истиот период лани, но сепак за 12 проценти помалку споредбено со 2019 година, која се смета за референтна година во авијацијата пред појавувањето на кризата со ковид-19.
