.webp){kind=icon}
„Кара“ ДООЕЛ е новиот сопственик на земјиштето на кое досега беше „Реплек маркет“ ДООЕЛ, односно познатиот „Хубо маркет“. Информацијата ја објави „Реплек“ АД - Скопје, соопштувајќи на Македонската берза дека купопродажбата се случила на 29 декември 2022 година. Станува збор за земјиште од 3.558 квадратни метри, а зделката вреди 1,4 милион евра со ДДВ.
„’Реплек’ АД објавува дека на 29.12.2022 година, друштвото ’Реплек маркет’ ДООЕЛ - Скопје, во целосна сопственост на ’Реплек’ АД, изврши продажба на 3.558 м2 земјиште на ’Кара’ ДООЕЛ - Скопје, со договорена продажна вредност во износ од 75.000.000,00 денари без вклучен ДДВ, односно од 88.500.000,00 денари со вклучен ДДВ“, стои во објавата.
Во септември минатата година „Реплек“ објави дека планира да даде јавен повик за собирање понуди за продажба на целиот удел во „Реплек маркет“.
„’Реплек’ АД - Скопје ќе даде јавен повик за собирање понуди за продажба на 100 отсто удел што го поседува како единствен содружник во ’Реплек маркет’ ДООЕЛ - Скопје, кој претставува повеќе од пет отсто од средствата на друштвата, определено врз основа на последните ревидирани годинашни финансиски извештаи“, стоеше во известувањето.
Компанијата „Кара“ не е котирана компанија, ниту е друштво од слободен пазар, па нема обврски за известувања во смисла на акционерската структура. Според податоци од Централниот регистар, оваа компанија постои од 1990 година и е друштво со ограничена одговорност основано од едно лице. Основна дејност на оваа компанија е издавање и управување со сопствен недвижен имот или имот земен под закуп (лизинг). Се знае дека „Кара“ е во сопственост на „Орка холдинг“ на познатиот бизнисмен Орце Камчев. „Орка холдинг“, пак, има учество во познатата турска болница во Скопје - „Аџибадем Систина“, која локациски се наоѓа многу блиску до продаденото земјиште.
