„Мајкрософт“ (Microsoft) објави дека ќе ја промени политиката за годишен одмор и ќе им дозволи на вработените во САД неограничен одмор, како што компанијата веќе направи во „Линкдин“ (LinkedIn).
Промените ќе стапат во сила на 16 јануари и ќе важат само за работниците со полно работно време во САД, соопшти портпаролот на компанијата. „Мајкрософт“ веќе неколку години размислува да ја направи таа промена за да се приспособи на пофлексибилни работни распореди.
Таквата политика, која веќе се применува во „Нетфликс“ (Netflix), но и во групацијата „Голдман Сакс“ (Goldman Sachs), која досега нудеше такви поволности само за поискусните банкари, може да се покаже како предизвик кога менаџерите поставуваат високи очекувања што не оставаат простор за одмор. Портпаролот рече дека „Мајкрософт“ ги разгледал можните негативни страни на таквиот систем за одмор и дека компанијата верува оти може да им го обезбеди на вработените посакуваното време за одмор.
Неограничениот годишен одмор, исто така, може да се смета како привилегија и за работодавците, со оглед на тоа што бара помала административна работа и затоа што вработените што даваат отказ или се отпуштени не мора да добијат надомест за неискористените денови на годишен одмор. „Мајкрософт“ во април ќе ги обесштети работниците со еднократна исплата за натрупаните слободни денови што не ги искористиле.
Теоретски, неограничен годишен одмор значи дека вработените немаат ограничување за тоа колку долго можат да одмораат. Сè додека се во чекор со обемот на работа и ефикасно управуваат со својот распоред, вработените можат да одвојат онолку време колку што им е потребно, без традиционалните ограничувања.
.webp){kind=icon}
Во моментов нема коментари за веста. Биди прв да коментира...