„Амазон“ (Amazon), компанија што се бори со забавувањето на растот на онлајн продажбата и се подготвува за можна рецесија, е подготвена да започне уште една рунда од масовното намалување на работните места.
Компанијата месецов објави дека отпушта повеќе од 18.000 вработени во корпоративните оддели - што е најголемо кратење на работните места во нејзината историја.
Елиминациите започнаа минатата година и првично беа најпогодени одделите за уреди и услуги, кои работат на дигиталниот асистент „Алекса“ (Alexa) и паметните звучници „Ехо“ (Echo). Најновата рунда, која треба да започне в среда, најмногу ќе влијае на малопродажниот сектор и човечките ресурси.
Иако намалувањата претставуваат само околу еден процент од вкупната работна сила, која вклучува стотици илјади работници во складиштата и сервисот за испорака, тие изнесуваат околу шест проценти од 350.000 корпоративни работни места на „Амазон“ низ светот.
„'Амазон' издржа неизвесни и тешки економски ситуации во минатото и ние ќе продолжиме да го правиме тоа“, порача извршниот директор Енди Џеси во меморандум до вработените во текот на месецов. „Овие промени ќе ни помогнат да се движиме кон нашите долгорочни цели со посилна структура на трошоците“.
Седиштето на „Амазон“ во Сиетл
Bloomberg
Најголемиот светски онлајн трговец на мало мина голем дел од минатата година приспособувајќи се на наглото забавување на растот на е-трговијата, бидејќи купувачите се вратија на навиките од пред пандемијата. „Амазон“ го одложи отворањето на магацините и ги запре вработувањата во својата малопродажна групација. Тоа замрзнување потоа се прошири на корпоративниот персонал на компанијата, а потоа почнаа да се прават кратења.
„Амазон“ е меѓу неколкуте големи технолошки компании што ги намалуваат своите редови, вклучувајќи ги „Циско“ (Cisco Systems Inc.), „Интел“ (Intel Corp.), „Мета“ (Meta Platforms Inc.), „Куалком“ (Qualcomm Inc.) и „Сејлсфорс“ (Salesforce Inc).
Во својот меморандум, Џеси порача дека компанијата со седиште во Сиетл ќе обезбеди испратнина и преодни здравствени придобивки за погодените работници.
.webp){kind=icon}
