Американското министерство за правда е подготвено да го тужи „Гугл“ (Google) на „Алфабет“ (Alphabet Inc.) веќе во вторник во врска со доминацијата на гигантот за пребарување над пазарот за дигитално рекламирање, според извори запознаени со ова прашање.
Случајот се очекува да биде поднесен пред Федералниот суд пред крајот на неделата, велат изворите, кои побарале да не бидат именувани бидејќи станува збор за доверливи прашања.
Министерството за правда не одговорило веднаш на барањето за коментар, а од „Гугл“ одбиле да коментираат.
Тужбата ќе го означи вториот монополски случај на Министерството за правда против компанијата, која е играч број 1 на американскиот пазар за дигитални реклами од 278,6 милијарди долари, при што го контролира најголемиот дел од технологијата што се користи за купување, продавање и сервисирање на онлајн рекламите.
Тужбата исто така ќе биде петти голем случај во САД што ги доведува во прашање деловните практики на компанијата. Државните јавни обвинители поднесоа три одделни тужби против „Гугл“, тврдејќи дека доминира на пазарите за онлајн пребарување, технологијата за рекламирање и апликациите на мобилната платформа Андроид, со што ги прекршува антимонополските закони.
Компанијата со седиште во Маунтин Вју, Калифорнија, е број 1 и на глобалниот пазар на дигитални реклами од 626,86 милијарди долари, според процените за 2023 година на истражувачката компанија „ЕМаркетер“, при што најголемиот дел им отпаѓа на САД. Рекламните операции на „Алфабет“ во 2023 година се очекува да донесат приходи од 73,8 милијарди американски долари од дигитални реклами во САД. „Гугл“ води услуга за купување реклами за огласувачи и за продажба на реклами за издавачи, како и размена на тргување каде што двете страни ги завршуваат трансакциите во молскавично брзи аукции.
„Гугл“ тврди дека пазарот за онлајн рекламирање е преполн и конкурентен пазар. Во судските поднесоци и сведочењата пред Конгресот, компанијата забележа дека меѓу нејзините ривали се и други големи играчи на рекламниот технолошки пазар, како што се „Амазон“ (Amazon.com Inc.), „Мета“ (Meta Platforms Inc.) и „Мајкрософт“ (Microsoft Corp).
Контролата врз „Гугл“ во однос на рекламниот технолошки пазар датира уште од администрацијата на Трамп. Министерството за правда под тогашниот јавен обвинител Вилијам Бар ја тужеше компанијата поради нејзиниот бизнис за пребарување, тврдејќи дека користела ексклузивни договори за дистрибуција со безжични оператори и производители на телефони за да ја потисне конкуренцијата. Тој случај треба да оди на судење во септември.
.webp){kind=icon}
