.webp){kind=icon}
Даночната политика многу влијае на развојот на пиварската индустрија и пиварниците со тоа се доведоа во ситуација да не можат да се развиваат на начинот на кој се развиваа и другите во регионот, вели Сашко Самарџиоски, генерален менаџер во „Прилепска пиварница“.
„Кога зборуваме за пиварската индустрија во Македонија, пред сè треба да разговараме за пиварската култура. Во повеќе од 30 години независност, државата малку направи за развој на пиварската култура со својата даночна политика. Според тоа, во однос на консумацијата, Македонија има најмала консумација на пиво по жител споредено не само со регионот туку и во Европа воопшто. Инаку, Македонија има најголема акциза по хектолитар во однос на сите европски држави“, вели Самарџиоски во разговор за телевизијата Блумберг Адрија.
Некои од инпутите во пиварската индустрија поскапеа повеќе од двојно, што ја прави ситуацијата повеќе од јасна дека цените на пивата ќе растат во наредниот период.
„Новиот ценовник веќе е најавен за нашите потрошувачи и ќе стартува од почетокот на февруари. Првите покачувања во просек се за околу 10 процентни поени. Затоа што разговараме за различен тип на пакувања, просекот е околу 10 проценти, што не значи дека цените ќе останат на ова ниво. Можно е во текот на сезоната да дојде до дополнително зголемување“, вели генералниот менаџер на „Прилепска пиварница“.
Според него, главен предизвик за годинава е справување со инфлаторната спирала, но и со недостигот од работна сила.
Во видеото е целосниот разговор на Блумберг Адрија ТВ со Сашко Самарџиоски, генерален менаџер на „Прилепска пиварница“.
