.webp){kind=icon}
Приходите од продажба на „Реплек“ минатата година пораснаа за седум проценти во однос на 2021 година, а најголем раст од девет проценти има на странските пазари, соопшти компанијата. На домашниот пазар растот на приходите е зголемен за три проценти.
Оттаму информираат дека растот на продажбата на странските пазари најмногу се должи на зајакнувањето на позициите и портфолиото на компанијата на пазарите во Европската унија, како и на пазарите во регионов и во ЗНД, Африка и Блискиот Исток, АСЕАН и други. Над 75 проценти од производите на „Реплек“ се пласираат на странските пазари, а останатиот дел отпаѓа на домашниот пазар.
„Позитивните резултати од работењето во минатата година не се случајни. Тие се резултат на промените кои ги реализираме во сите делови од нашето работење. Интерната реорганизација, подигнувањето на капацитетите и можностите на продажната мрежа, едукацијата и воведувањето иновативни решенија резултираа со позитивни резултати на сите пазари на кои се присутни нашите производи. Новата извозна стратегија која е приоритет на овој менаџмент на „Реплек“ ги даде првите резултати, а реформите ќе продолжат, па очекуваме раст на пазарите и во наредниот период“, вели Душан Пецовски, главен извршен директор на „Реплек“.
Од компанијата додаваат дека во изминатиот период инвестирале во подобрување на конкурентноста на производите преку воведување иновативни решенија, а се работело и на подобрување на капацитетите на веледрогеријата.
„Овој тренд ќе продолжи и во следниот период за дополнително да се зајакнат позициите на странските пазари. Компанијата во континуитет инвестира и во целосна модернизација и трансформација на работењето, поставувајќи нови напредни стандарди. Во таа насока, „Реплек“ инвестираше 43 милиони денари во фотоволтаична централа со инсталирана моќност од 948.29 kWp, заменувајќи над 40 проценти од вкупната потрошувачка на електрична енергија со обновлива сончева енергија. Компанијата доби и А - интегрирана еколошка дозвола, што е потврда за одговорното работење, континуираниот мониторинг и намалување на влијанието врз животната средина“, велат од компанијата.
