Платформата „Зум“ (Zoom Video Communications Inc) отпушта 15 проценти од своите работници, бидејќи услугата што стана сеприсутна за време на пандемијата сега се приспособува на побавниот раст.
„Компанијата ќе укине околу 1.300 работни места, како дел од реструктурирањето“, изјави денеска главниот извршен директор Ерик Јуан во објава на блог. Јуан се нарече себеси одговорен за проблемите на компанијата и рече дека ќе ја намали својата плата и ќе се откаже од бонусот.
„Нашата траекторија беше засекогаш променета за време на пандемијата. Не одвоивме толку време колку што требаше за темелно да ги анализираме нашите тимови или да процениме дали растеме одржливо“, рече Јуан, додавајќи дека бројот на вработени во „Зум“ се зголемил тројно за период од две години.
Bloomberg Mercury
Овие кратења на работните места претставуваат поголем дел од вкупната бројка на вработени за разлика од отказите објавени во софтверските компании, вклучувајќи ги „Сејлсфорс“ (Salesforce Inc), „Мајкрософт“ (Microsoft Corp) и „Воркдеј“ (Workday Inc).
Акциите на „Зум“ паднаа за 47 проценти во последните 12 месеци, заклучно со вчерашниот ден. Откако придоби милиони корисници во екот на пандемијата, „Зум“ сега се обидува да го промени забавувањето на растот со проширување на своите алатки за бизнис. Сепак објави едноцифрено зголемување на приходите за последните два квартала, а аналитичарите предвидуваат дека продажбата продолжува да се забавува во тековниот квартал.
Јуан, основачот на компанијата со седиште во Сан Хозе, Калифорнија, рече дека неговата основна плата, која беше 301.731 американски долар минатата година, ќе биде намалена за 98 отсто и тој ќе се откаже од корпоративниот бонус за фискалната 2023 година. Неговата вкупна заработка за фискалната 2022 година изнесуваше 1,1 милион долари, според пријавата во мај 2022 година. За другите од извршното раководство ќе има 20 проценти намалување на основната плата.
.webp){kind=icon}
Во моментов нема коментари за веста. Биди прв да коментира...