Корпорацијата „Мајкрософт“, која спроведува отпуштање на 10.000 работници најавено уште минатиот месец, во четвртокот ги намали работните места во единиците, вклучувајќи ги уредите „Сурфејс“ (Surface), хардверот за мешана реалност „Хололенс“ (HoloLens) и „Иксбокс“ (Xbox), информираат лица запознаени со ова прашање.
Намалувањето на поголемиот дел од хардверскиот тим на „Хололенс“ го отвора прашањето дали компанијата ќе произведе трета серија од очилата, надвор од планираната верзија за американската армија, велат изворите, кои одбија да бидат именувани, бидејќи станува збор за доверливи работи. Во единицата за игри на „Иксбокс“ дојде до откази во маркетингот и во „Иксбокс гејминг екосистем“ (Xbox Gaming Ecosystem Group), информираат изворите на „Блумберг“.
Раководителот на „Иксбокс“, Фил Спенсер, вчера им испрати електронска пошта на вработените за да ги извести за отказите без да објасни кои делови од работењето на овој сектор биле погодени.
„Ги охрабрувам сите да одвојат време и простор потребни за да се обработат овие промени и да ги поддржат своите колеги“, напиша Спенсер во електронската пошта, која на увид ја доби и „Блумберг“.
„Мајкрософт“ одби да коментира за кратењата на работните места, но рече дека останува посветен на просторот за мешана реалност и тековната верзија на „Хололенс 2“.
„Иако не коментираме конкретни детали за персоналот, можеме да споделиме дека нема промени во ’Хололенс 2’ и нашата посветеност на мешаната реалност“, се вели во соопштението на компанијата.
Според известувањето поднесено до државата, во Сиетл биле отпуштени вкупно 617 работници.
„Мајкрософт“ минатиот месец соопшти дека во текот на овој квартал планира да укине 10.000 работни места, или околу пет проценти од својата работна сила. Заработката во последниот квартал изнесува 1,2 милијарда долари, од кои 800 милиони се резултат на отказите, а остатокот се резултат од промените во хардверското портфолио на компанијата и трошоците за консолидирање на закупот на недвижен имот. Компанијата не даде детали за хардверските промени или каде конкретно се случиле намалувањата.
Отказите минатиот месец го погодија студиото за видеоигри што ги прави игрите „Хало“ (Halo) на „Мајкрософт“ и другите работници во групата за мешана реалност, вклучувајќи и некои од тимот што работи на верзијата на „Хололенс“ за американската армија. „Мајкрософт“ наскоро нема да добива повеќе нарачки за своите борбени очила откако Конгресот минатиот месец го одби барањето на армијата за 400 милиони долари за купување дури 6.900 такви производи во тековната фискална година. Без голема нарачка од армијата, иднината на хардверскиот бизнис на „Хололенс“ може да биде доведена во прашање поради недостигот од доволно значајни клиенти, велат анонимните извори.
.webp){kind=icon}
Во моментов нема коментари за веста. Биди прв да коментира...