.webp){kind=icon}
Германската авиокомпанија „Луфтханза“ (Deutsche Lufthansa AG) ги приземји сите свои летови во средата поради компјутерски проблеми најверојатно предизвикани од прекин на широкопојасен кабел на „Дојче телеком“, според лице запознаено со ситуацијата.
Портпаролот на „Луфтханза“ нагласи дека проблемите влијаат на копнените системи на компанијата, вклучувајќи ги и операциите за чекирање. Германската контрола на летање ги пренасочува слетувањата од Франкфурт, главната база на „Луфтханза“, за да спречи застој. Летовите се пренасочуваат кон други германски аеродроми, вклучувајќи ги Нирнберг, Келн и Дизелдорф.
Глобалниот оперативен центар за летови на „Луфтханза“ се наоѓа на периферијата на аеродромот во Франкфурт; оштетувањето на комуникациските врски до објектот може да предизвика проблеми со копнените ИТ-системи на „Луфтханза“ низ светот. Превозникот преку твит потврди дека проблемите со ИТ биле предизвикани од градежни работи во регионот на Франкфурт.
Групата има вкупно околу 700 авиони, што ја прави најголема авиокомпанија во Европа според големината на флотата. Групацијата на авиокомпании ги вклучува својот истоимен бренд и националните авиопревозници „Аустријан ерлајнс“ (Austrian Airlines), „Браселс ерлајнс“ (Brussels Airlines) и „Свис“ (Swiss). Компанијата исто така оперира со нискобуџетна компанија „Еуровингс“ (Eurowings), како и со други помали брендови.
„Луфтханза“ падна дури за 2,5 отсто во Франкфурт. Акциите годинава сè уште се во пораст од околу 22 отсто.
Германската компанија следниот месец треба да ја пријави заработката за 2022 година. Во декември, авиопревозникот ја зголеми целта за годишната заработка поради враќањето на воздушниот сообраќај.
