Маск ќе го води „Твитер“ до крајот на годината, откри што мисли за наследникот

Илон Маск изјави дека најверојатно ќе му треба остатокот од годинава да ги поправи работите во „Твитер“ пред да му го предаде на нов извршен директор. Објавата ја продлабочи загриженоста на инвеститорите дека вниманието на милијардерот е одвлеченo од управувањето со „Тесла“ (Tesla).

„Морам да ја стабилизирам организацијата, да се погрижам да биде финансиски здрава и со јасен план за понатамошниот развој на платформата“, рече Маск во средата преку далечинска видеоврска на светскиот самит на влади во Дубаи.

„Претпоставувам дека крајот на годинава би бил добро време да се најде некој друг да ја води компанијата. Мислам дека дотогаш таа треба да биде во стабилна состојба“, истакна Маск.

Откако ја презеде функцијата во октомври, Маск нагласи дека планира да се пензионира во одреден момент, но никогаш не прецизираше кога. Потрагата по нов извршен директор на „Твитер“ започна во декември, изјави тогаш лице запознаено со ситуацијата. Во меѓувреме, неговото отсуство од „Тесла“ налути некои инвеститори, кои го повикаа да му посвети поголемо внимание на производителот на електрични возила.

Извршниот директор на „Тесла“, „Твитер“ и „Спејс екс“ (Space Exploration Technologies) рече дека двете производствени компании сега се во подобра позиција од претходно. „'Спејс екс' може да направи голем напредок дури и ако поминувам помалку време таму, а 'Тесла' сега одзема помалку време отколку пред неколку години. 'Тесла' мина низ многу тешки времиња кога беше на работ на опстанок. Потребно е многу помалку работа за да се управува со 'Тесла' сега во споредба, на пример, со временската рамка од 2017 до 2019 година“, додаде тој.

Маск се обврза дека ќе ги предаде уздите на „Твитер“ по анкетата што ја спроведе меѓу своите следбеници во декември. Речиси 60 отсто од анкетираните беа за негово заминување, делумно поради загриженоста дека управувањето со „Твитер“ ќе му го одвлече вниманието од „Тесла“. По анкетата тој најави дека се работи на тоа да се најде „некој доволно наивен за да ја преземе работата“.

Сепак, Маск во неколку наврати досега ги пробиваше роковите што ги постави и вети, особено за новите производи и иновации, како што е „сајбертрак“ (Cybertruck) или софтверските можности за целосно автономно управување на возилата.

Маск беше виртуелно интервјуиран од Мохамад Абдула ал Гергави, министерот за деловни активности на Обединетите Арапски Емирати, кој претседава со самитот. Маск го приватизира „Твитер“ преку зделка вредна 44 милијарди долари и е вториот најбогат човек во светот, со лично богатство од 187 милијарди долари, според индексот на милијардери на „Блумберг“.

На самитот, Маск го опиша „Твитер“ како малку обратен стартап. „Потребно е многу работа за да се доведе 'Твитер' во стабилна позиција“, нагласи тој.

Маск, за кого меѓу другото е познато дека спиел во фабриката на „Тесла“ во особено тешките периоди, рече дека работи седум дена во неделата и спие шест часа навечер. Работата обично го окупира од моментот кога ќе се разбуди до легнувањето, како што посочи тој. „Немам намера да работам како луд. Осумдесетчасовна работна недела би била во ред и тоа е она кон кое тежнеам“.

Маск долго зборуваше за својата визија за „Твитер“ и за напорите да ја ослободи платформата од дезинформации. Тој исто така рече дека сака „Твитер“ да биде извор на вистината и ги охрабри компаниите, другите извршни директори и министри да зборуваат автентично, дури и ако тоа предизвикува напади. „Да се ​​има малку критика е добро. Навистина не е толку лошо. Ме напаѓаат постојано на Твитер и не ми пречи“.

Запрашан дали им ја ограничил употребата на социјалните мрежи на неговите деца, Маск рече: „Не се обидов да ги ограничам социјалните мрежи за моите деца, но тоа можеби беше грешка“, истакна тој.

Во моментов нема коментари за веста. Биди прв да коментира...

Остави коментар