Компанијата мајка на Фејсбук, „Мета“ (Meta Platforms Inc), лансира претплатничка услуга наречена „Мета потврдена“ (Meta Verified), која вклучува неколку дополнителни поволности и функции, вклучувајќи и значки за потврда на сметката за тие што плаќаат.
Новата претплата ќе чини од 11,99 до 14,99 долари месечно, ако се купи преку апликацијата ИОС (iOS), а првенствено е наменета за креаторите на содржини. Покрај значката за потврда, претплатата вклучува и проактивна заштита на профилот, пристап до поддршка на сметката и зголемена видливост и опсег, информира портпаролот на „Мета“ преку електронска пошта.
Главниот извршен директор Марк Закерберг го објави новиот производ преку својот канал на Инстаграм, услуга што беше претставена изминатата недела. Опцијата ќе биде достапна и на Фејсбук и на Инстаграм, но тоа ќе бидат посебни претплати. Понудите за претплата во последните години станаа популарни за компаниите за социјално вмрежување, како начин за диверзификација на нивните бизниси, кои во голема мера се зависни од рекламирањето.
„Снеп“ (Snap Inc) има понуда наречена „Снепчет плус“ (Snapchat Plus), а Твитер (Twitter Inc) исто така моментално ја турка понудата за претплата, при што верификација на сметката претставува главна продажна точка.
„Мета“ речиси сите свои приходи ги остварува од реклами, но тој бизнис може да биде неконзистентен и сериозно погоден од пошироката економија. Бизнисот на „Мета“ беше силно погоден на почетокот на пандемијата и повторно минатата година за време на војната во Европа и порастот на инфлацијата. Претплатите нудат поконзистентен прилив на приходи. Сепак, не е јасно дали корисниците сакаат да платат за услуги што отсекогаш биле бесплатни.
Понудата за претплата на Твитер бавно расте. Можеби највредниот аспект на пакетот за претплата на „Мета“ ќе биде зголемената видливост. Да се истакнете на Фејсбук или Инстаграм е потешко овие денови, дури и меѓу сопствените следбеници. Компанијата почна да ги турка корисниците кон повеќе содржини за кои можеби се заинтересирани, а не нужно кон содржина од луѓето што ги следат.
„Зголемената видливост ќе значи истакнување во некои области на платформата, како пребарување, коментари и препораки“, велат од компанијата.
За разлика од Твитер, кој не го потврдува идентитетот на корисникот преку претплатата, „Мета“ ќе бара од корисниците да го потврдат својот идентитет со лична карта за да добијат значка за потврда. „Мета“ ќе го тестира производот за претплата прво во Австралија и Нов Зеланд, почнувајќи од крајот на оваа недела.
.webp){kind=icon}
