АВС (AWS) на „Амазон“ (Amazon.com Inc) ги вклучи телефонските компании, вклучувајќи ја и „Т-мобиле“ (T-Mobile US Inc), како и матичната „Дојче телеком“ (Deutsche Telekom AG), како партнери што ќе им нудат приватни безжични услуги на бизнисите.
АВС, кој ги снабдува компаниите со компјутерска моќ и складирање податоци, се обидува да продава напредни безжични мрежи како замена за вај-фај (Wi-Fi) во канцелариите и работните места.
Други партнери се јапонската КДДИ (KDDI Corp), француската „Оринџ“ (Orange SA) и шпанската „Телефоника“ (Telefonica SA). Приватните мрежи се една од областите каде што АВС бара да ги прошири своите услуги и да ги зголеми приходите. Бизнисот обезбедува најголем дел од профитот на „Амазон“, иако растот на продажбата забави минатата година.
Со ширењето на побрзата безжична мрежа 5Г (5G), компаниите може да ја надградат својата внатрешна поврзаност. Според извршниот директор на АВС, Јан Хофмајр, вај-фај е добар за денешна употреба, но има ограничувања.
„Мрежата 5Г дава прецизна локација и мала латентност“, рече тој.
„Амазон“ го најави партнерството пред Светскиот конгрес за мобилна телефонија во Барселона, кој е годишен саем за безжична индустрија, што треба да се одржи месецов.
Откако потрошија милијарди долари на 5Г-мрежи, телефонските компании се мачеа да ги натераат бизнисите да ја усвојат новата технологија. Се реализираа само неколку големи работни проекти. „Веризон комуникејшн“ (Verizon Communications Inc) беше ангажирана да изгради приватна мрежа во новото седиште на „Блекрок“ (BlackRock Inc) во Њујорк. А, пред една година, на Светскиот конгрес за мобилни телефони, „AT&T Inc“ објави дека се здружува со „Азур“ (Azure) на „Мајкрософт“ (Microsoft Corp) за да продава приватни 5Г-мрежи.
.webp){kind=icon}
