„Макпетрол“ лани оствари добивка од 20,9 милиони евра

„Макпетрол“ АД Скопје минатата година оствари добивка по одначување од 1,29 милијарди денари (20,9 милиони евра), што е намалување за шест проценти во однос на претходната година кога добивката на компанијата изнесувала 1,37 милијарди денари (22,3 милиони евра), покажува неревидираниот биланс на успех на компанијата објавен преку Македонската берза. 

Од „Макпетрол“ информираат дека лани е остварен вкупен приход во износ од 37,6 милијарди денари (611 милиони евра), што е зголемување од 67,2 проценти во однос на 2021 година.

„На квартално ниво, вкупните приходи во 2022 година бележат раст и ги надминуваат и предпандемските нивоа, во најголем дел поради зголемувањето на цените на нафтените деривати“, велат од компанијата. 

Оттаму информираат дека во структурата на приходите, најголем удел со 98,79 проценти имаат приходите од продажба, од кои 93,33 проценти се остварени преку продажба на домашен пазар, а само 5,46 проценти се остварени преку продажба на странски пазар.

„Порастот на приходите, споредбено со минатата година, во најголем дел се должи на зголемените приходи на мало за 49,02 проценти, а истите учествуваат со 74,59 проценти во приходите од продажба. Трендот на пораст на приходите на мало во годината се должи на зголемување на прометот со нафтени деривати на мало за 4,5 проценти и зголемување на прометот на останатиот малопродажен асортиман (ДАС) за 37,17 проценти“, соопшти „Макпетрол“.

Вкупните расходи остварени во 2022 година се во висина од 36,2 милијарди денари (588 милиони евра) што претставува зголемување во однос на минатата година за 2,76 проценти.

„Порастот во најголем дел се должи на зголемените расходи за набавна вредност на трговски стоки од 79,52 проценти. Набавната вредност го следи трендот на приходите од продажба, што  е неминовно со оглед дека истата во апсолутен износ е дел од приходите од продажба, односно зафаќа околу 89 проценти од приходите“, велат од компанијата. 

Од „Макпетрол“ велат дека во текот на 2022 година, друштвото работело во услови на економска криза, која се чувствувала, како на локално, така и на глобално ниво.

„Економската криза започна со пандемијата на вирусот ковид-19, а беше продлабочена како резултат на воениот конфликт помеѓу Русија и Украина, кој доведе и до значајно зголемување  на цените на енергентите на светските берзи. Воениот конфликт, односно зголемувањето на  цените, ја продлабочи енергетската криза, која кулминираше дури со скоро двојно зголемување  на цените на дериватите споредено со минатата година“, велат од компанијата. 

Оттаму додаваат дека наглото олабавување на рестриктивните ковид мерки започнувајќи од март 2022 година и зголемувањето на економската активност заедно со нарушувањата во синџирите за снабдување резултирале со растечки стапки на инфлација.

„Истите беа дополнително зголемени како резултат  на енергетската криза и до крајот на 2022 година, достигнаа двоцифрен износ во најголем дел од светот. Глобалните движења и трендови неминовно влијаеја и се пресликаа и во Република Северна Македонија, што беше и очекувано со оглед на увозната зависност на земјата“, велат од „Макпетрол“. 

Во компанијата констатираат дека на економски  план, 2022 година е лоша година. 

„Прогласена е енергетска  криза во државата, цените на храната и енергенсите се зголемија, каматните стапки пораснаа, инфлацијата беше двоцифрена и изнесуваше 14,2 проценти на годишно ниво, а БДП падна на 2 проценти. И покрај сите предизвици, во текот на 2022 година „Макпетрол“ АД оствари позитивни резултати“, велат од компанијата.

Во моментов нема коментари за веста. Биди прв да коментира...

Остави коментар