Бројот на банкротирани фирми во Шведска расте седми последователен месец, при што трговците на мало во февруари беа притиснати од падот на потрошувачката на домаќинствата, а градежната индустрија се бори по тековниот распад на пазарот на недвижности.
Економијата на Шведска се витка под тежината на зголемените потрошувачки цени и растечките трошоци за задолжување. Можеби веќе е во тек рецесија, бидејќи задолжените домаќинства, чии хипотекарни стапки се обично фиксни за кратки периоди, ги стегаат ремените и падот на цените на становите брзо ги намалува инвестициите во нови станови.
Во февруари бројот на банкроти се зголеми за 11 отсто во споредба со истиот месец пред една година, според податоците на кредитната референтна агенција УК (UC), од каде што рекоа дека трговците на мало и трговијата со моторни возила биле најтешко погодени од неисполнувањето на обврските минатиот месец.
„Бројот на банкроти е сè уште на високо ниво и е зголемен во споредба со минатата година“, рече во изјавата економистката од УК, Јохана Бломе, додавајќи дека порастот бил поумерен во февруари отколку во јануари. „Сè уште е тешко да се биде преголем оптимист, бидејќи се очекуваат повеќе зголемувања на каматните стапки и инфлацијата не забавува со темпото што би сакале да го видиме“, рече таа.
Најголемата шведска компанија што поднесе барање за стечај во февруари беше авиопревозникот „Ер лип“ (Air Leap), чија годишна продажба, според посебното соопштение на „Кредитсејф“ (Creditsafe), изнесуваше 27 милиони долари.
.webp){kind=icon}
Во моментов нема коментари за веста. Биди прв да коментира...