Банка во САД оценета како компанија со висок ризик размислува за продажба

Банката „Фрст рипаблик“ (First Republic Bank), со седиште во Сан Франциско, која „СП глобал“ (S&P Global Ratings) и „Фич“ (Fitch Ratings) во средата ја означија како компанија со висок ризик, разгледува стратегиски опции, вклучувајќи и продажба, според луѓе запознаени со ова прашање.

Банката, која исто така разгледува опции за зајакнување на ликвидноста, се очекува да привлече интерес кај поголемите ривали, велат изворите што побарале да останат анонимни, бидејќи станува збор за доверливи информации. Не е донесена одлука и банката сепак може да одлучи да остане независна, додаваат тие. Портпаролот на „Фрст рипаблик“ одби да коментира.

Од банката во неделата соопштија дека имаат повеќе од 70 милијарди долари неискористена ликвидност за финансирање на операциите од договорот во кои се вклучени и Федералните резерви и „ЏП Морган“ (JPMorgan Chase & Co). Сепак, акциите на банката паднаа за 21 отсто на тргувањето во Њујорк во средата, на најниско ниво од 31,16 долар, што ѝ дава пазарна вредност од 5,8 милијарди долари.

„Дополнителните капацитети за задолжување од Федералните резерви, континуираниот пристап до финансирање преку Федералната банка за станбени кредити и можноста за пристап до дополнително финансирање преку 'ЏП Морган' го зголемуваат, диверзифицираат и дополнително го зајакнуваат постојниот профил на ликвидност на 'Фрст рипаблик'“, се вели во неделното соопштение на банката.

Заемодавецот е специјализиран за приватно банкарство и управување со средства и направи обид да се разликува од банката „Силикон валеј“ (СВБ), која беше запленета од американските регулатори. За разлика од СВБ, која меѓу своите најголеми клиенти имаше стартапи и фирми за ризичен капитал, „Фрст рипаблик“ посочи дека ниту еден сектор не претставувал повеќе од девет проценти од вкупните деловни депозити.