text size
Грчкиот национален авиопревозник „Ејџијан ерлајнс“ (Aegean Airlines) го зголемува бројот на летови меѓу Атина и Скопје.
Авиокомпанијата првично ќе ги зголеми летовите од два на три неделно, почнувајќи од 1 јуни, по што фреквенциите ќе се зголемат на шест пати неделно од 29 септември. Сите услуги ќе се одржуваат со авион од типот ATR72, управуван од регионалната подружница на „Ејџијан“, „Олимпик ер“ (Olympic Air), јавува „Ексјуавиејшн“ (exyuaviation).
Оваа информација неофицијално беше потврдена и за „Блумберг Адрија“.
Веќе пишувавме дека нови летови и нови авиолинии од домашните аеродроми се најавуваат во текот на летната сезона. Летниот ред на летови започнува да се применува од 25 март. Од „ТАВ Македонија“ најавија дека очекуваат успешна летна сезона и оваа да биде година на целосно постпандемиско закрепнување.
„Луфтханза“ од 23 април ќе почне да лета на релацијата Франкфурт - Скопје - Франкфурт со десет лета неделно. Нова дестинација, Сплит, ќе биде воведена од страна на „Кроација ерлајнс“ од скопскиот аеродром. Авиокомпанијата ќе лета меѓу главниот град на Северна Македонија и туристичкиот центар на Далмација во текот на летната сезона, од 12 мај до 14 октомври 2023 година, двапати неделно. Уште еден новитет доаѓа од охридскиот аеродром и од авиокомпанијата „Ер Србија“, која ќе ја обнови линијата Белград - Охрид од јуни 2023 година. „Македонскиот туристички и културен центар Охрид ќе се поврзува авионски со Белград четири пати неделно“, велат од „ТАВ Македонија“.
Како и во изминатите летни сезони, и оваа ќе има сезонски летови од скопскиот аеродром до летните дестинации како Анталија, Измир, Бодрум, Хургада и Тунис (Монастир/Енфида). Овие сезонски летови најчесто се одвиваат од крајот на мај до октомври.
.webp){kind=icon}
