.webp){kind=icon}
Финтек-компанијата „Нувеи“ (Nuvei Corp.), давател на платежни услуги во индустријата за спортско обложување, најави инвестиција од холивудскиот актер и инвеститор Рајан Рејнолдс.
Рејнолдс исто така направи маркетинг-кампања за „Нувеи“. На Твитер актерот објави видео во кое седи на бирото на главниот извршен директор Филип Фејер и се потсмева на неговиот низок профил во споредба со директорите на американските технолошки гиганти.
Компанијата, основана во Монтреал во 2003 година, нуди платформа за плаќање за бизниси во близу 50 земји. Таа нуди услуги за клиенти од гејминг и криптоиндустријата, вклучувајќи ги „Драфт кингс“ (DraftKings Inc.) и „Бајненс“ (Binance Holdings Ltd.).
„Знам за финтек исто толку колку што знаев за џин или за мобилна телефонија пред неколку години“, посочи Рејнолдс во соопштение за медиумите. „Но 'Нувеи' е импресивен. Водечкиот тим е исклучително интелигентен и вреден и време е една канадска компанија да го добие вниманието на американските технолошки компании“.
Рејнолдс го поддржа евтиниот безжичен провајдер „Минт мобајл“ (Mint Mobile), кој минатиот месец се согласи на продажба на „Т-мобајл САД“ (T-Mobile US Inc.) за дури 1,35 милијарда долари.
Прочитајте повеќе: „Т-мобајл“ купува компанија на Рајан Рејнолдс за 1,35 милијарда долари
Во февруари, „Нувеи“ затвори 1,3 милијарда долари вредна аквизиција со „Паја холдингс“ (Paya Holdings Inc.), со седиште во Атланта, која обезбедува решенија за плаќање во здравствената заштита, образованието, владиниот и непрофитните сектори.
