Панел составен од американски сенатори во вторникот соопшти дека проблематичната швајцарска банка „Кредит Суис“ (Credit Suisse Group) ја попречила долгогодишната истрага за сервисирање на нацистички клиенти и сметки поврзани со нацистите.
„Кредит Суис“ нарача истрага за наводите на организација за човекови права дека банката имала сметки поврзани со нацистите и дека не успеала да ги открие, дури и за време на истраги поврзани со холокаустот, неколку децении порано.
Неодамнешната истрага на одбор на Сенатот за ова прашање откри дека банката ја опструирала истрагата и „необјасниво го укинала“ независниот ревизор кој ја надгледувал.
„Информациите што ги добивме покажуваат дека банката воспоставила непотребно крут и тесен опсег и одбила да ги следи новите траги откриени за време на ревизијата“, посочи републиканскиот сенатор Чак Грасли, високо рангиран член на Комитетот за буџет на Сенатот.
„Кредит Суис“ застана во одбрана на својата внатрешна ревизија, велејќи дека истрагата не пронашла докази за поддршка на клучните тврдења на центарот „Симон Вајзентхал“ (Simon Wiesenthal) дека неактивни сметки што ги сервисирала „Кредит Суис“ содржат имот на жртви од Холокаустот.
Претставникот на „Аликс партнерс“ (AlixPartners), консултантска фирма што „Кредит Суис“ ја ангажирала за истрагата, не одговори веднаш на барањето за коментар.
Комитетот на Сенатот посочи дека треба да се направи повеќе за да се открие вредноста на средствата на одредени банкарски сметки што ги чувале нацистите во периодот по 1945 година.
Комитетот во соопштение посочи дека отворил сопствена истрага откако добил „веродостојни наводи за потенцијални неправилности“ поврзани со внатрешната истрага, вклучително и укинувањето на ревизорот кој ја надгледувал.
Портпаролот на ревизорот одби да коментира. Неговиот извештај, кој комитетот го добил преку судски повик, открива дека многу прашања останале „неодговорени“ откако „Кредит Суис“ одлучила да ја запре ревизијата.
Поранешен адвокат на банката
„Одлуката на 'Кредит Суис' да ја запре ревизијата на средина на процесот, остави многу прашања неодговорени, вклучително и оние за темелноста на нивните претходни истражни напори, степенот до кој таа им служела на нацистичките интереси и улогата на банката во овозможувањето услуги за нацистите кои по војната бегале од лицето на правдата“, рече поранешниот адвокат на банката Нил М. Барофски, чие полномошно беше повлечено во ноември минатата година, пренесуваат светските медиуми.
„Кредит Суис“ во вторникот одговори со соопштение на изјавата на адвокатот, во која тие велат дека изјавите на Барофски се „фактички неточни и се неосновани тврдења засновани на нецелосно разбирање на фактите. Банката категорично ги отфрла овие погрешни претстави“, се вели во реакцијата, иако е испуштено конкретно да се наведат грешките кои ги посочуваат.
Губење на довербата на акционерите
Претседателот на „Кредит Суис“, Аксел Леман, месецов им се извини на акционерите за неуспехот да го спречи губењето на довербата во банката.
„Не успеавме да го запреме влијанието на наследените скандали и да се спротивставиме на негативните наслови со позитивни факти“, рече Леман во забелешките подготвени за годишното собрание на акционери на банката во Цирих. На крајот „банката не можеше да се спаси“.
Признанието за вина дојде откако акционерите се соочија со менаџментот на банката, по историското преземање од страна на УБС (UBS Group), кое го означи крајот на 167-годишниот делување на „Кредит Суис“. Договорот од три милијарди франци беше финализиран минатиот месец без одобрение на акционерите на „Кредит Суис“ или УБС, бидејќи швајцарската влада побрза да го затвори.
.webp){kind=icon}
Во моментов нема коментари за веста. Биди прв да коментира...