.webp){kind=icon}
Растот во двете најголеми европски економии нагло забави бидејќи производителите страдаат од недостиг на побарувачка, сè позатегнати синџири на снабдување и зголемени цени.
По првичното засилување предизвикано од олабавувањето на ограничувањата против Ковид-19 во Германија и Франција, мерилата на активност паднаа повеќе од очекуваното во јуни. Производствениот аутпут се намали во двете земји исто како и новите нарачки, според истражувањата на S&P Global.
Bloomberg
Настрадаа и давателите на услуги, со заладување на активноста по првичниот поттик од постепеното укинување на заклучувањето поради пандемијата.
„Германската економија го загуби практично целиот импулс добиен од олеснувањето на ограничувањата поврзани со вирусот“, порача во соопштение Фил Смит, економист на S&P Global. „Но, можеби најголемата причина за загриженост е падот на побарувачката“, додава тој.
Извештаите сигнализираат дека, засега, економската активност сè уште е донекаде поддржана од обемот на работа што беше создаден претходно годинава. Но, нивото на предизвици со кои се соочува светската економија доведе до загриженост дека на повидок е рецесија.
Тие стравови се разгоруваат со зголемувањето на каматните стапки, при што Европската централна банка е подготвена да ги зголеми трошоците за задолжување за првпат по повеќе од една деценија во јули.
Во услови на вакви мрачни перспективи, Германија и Франција забележаа бавен раст на работните места, бидејќи компаниите почнаа да ги преоценуваат своите потреби за персонал, соопшти S&P Global.
