.webp){kind=icon}
Коосновачот на Твитер, Џек Дорси, кој некогаш ja поддржа аквизицијата од 44 милијарди долари од страна на Илон Маск, сега остро го критикува новиот сопственик и неговиот стил на лидерство.
Запрашан дали Маск се покажа како најдобар можен извршен директор, Дорси рече: „Не. Ниту, пак, мислам дека дејствуваше откако сфати дека неговиот тајминг е лош. Ниту, пак, мислам дека одборот требаше да ја истурка продажбата“.
По пресвртот на берзите набрзо по неговата понуда за купување на Твитер пред една година, Маск се обиде да се повлече од договорот. Ова предизвика правна битка меѓу компанијата и милијардерот, пред да биде завршена аквизицијата по првично понудената цена.
„Сè тргна во погрешна насока“, напиша Дорси на Блускај (Bluesky), алтернативата на Твитер која тој ја поддржува и на која може да се пристапи само со покана.
Твитер не одговори конкретно на барањето за коментар.
Дорси, кој со години е пријател со Маск и му предложи да се приклучи на Твитер, претходно јавно го поддржа договорот. Минатата година тој рече дека Маск, како сопственик на Твитер е „единственото решение во кое верува“.
Во петокот, еден корисник на Блускај рече дека е прилично тажно како испадна сето тоа, на што Дорси одговори „да“. Но, Твитер „никогаш не би опстанал како јавна компанија“, додаде тој во друга објава. „Дали повеќе би сакале да биде во сопственост на хеџ фондови и активисти на Волстрит? Тоа беше единствената алтернатива“.
Под Маск, кој ја презеде функцијата на крајот на октомври, Твитер отпушти поголем дел од персоналот и претрпе серија јавни кризи, вклучително и планот за плаќање за верификација на корисниците. Маск воведе претплата на Твитер каде што корисниците можат да добијат сино лого за осум долари месечно.
„Плаќањето како доказ за идентитетот е замка и јас воопшто не се согласувам со тоа“, изјави Дорси на платформата Блускај. „Тоа исклучува милиони, ако не и милијарди луѓе“.
