Извршната директорка на „Ен-би-си јуниверзал“ (NBCUniversal), Линда Јакарино, е во преговори да стане извршна директорка на „Твитер“, објави „Волстрит журнал“ (Wall Street Journal), по најавата на сопственикот Илон Маск дека нашол нов лидер за социјалната платформа и дека тој ќе премине на функцијата главен директор за технологија.
Во твит од четвртокот Маск порача дека новиот извршен директор на компанијата ќе започне со работа за околу шест недели, без да го именува лицето. Јакарино, која е претседателка за глобално рекламирање и партнерства во „Ен-би-си јуниверзал“, не одговори на прашањата на медиумите.
Јакарино му се приклучи на „Ен-би-си јуниверзал“ во 2011 година, по речиси две децении во „Тарнер бродкастинг“ (Turner Broadcasting). Во„Ен-би-си јуниверзал“ таа помогна во лансирањето на услугата за стриминг „Пикок“ (Peacock) поддржана од реклами и ги надгледуваше настаните во живо, како Супербоул и Олимпијадата. Јакарино исто така водеше партнерства со различни технолошки компании, вклучувајќи ги „Снепчет“ (Snapchat), „Јутјуб“ (YouTube) и, се разбира, „Твитер“.
Ако Јакарино е изборот на Маск, неговиот твит дојде во незгодно време за нејзината сегашна компанија. „Ен-би-си јуниверзал“ ќе ја одржи својата годишна презентација за огласувачи во Њујорк в понеделник. Тоа е време кога големите медиумски компании почнуваат да продаваат реклами за есенската ТВ-сезона.
Новата извршна директорка на „Твитер“? / Bloomberg
Годинешните презентации веќе наидоа на проблеми со штрајкот на сценаристите, што може да резултира со големи одложувања во ТВ-продукцијата и распоредот.
Прочитајте повеќе на: Холивудските сценаристи на штрајк, многу серии може да бидат одложени
Настанот на „Ен-би-си јуниверзал“ се очекува да се фокусира во голема мера на онлајн рекламирањето.
Маск го купи „Твитер“ минатиот октомври, за 44 милијарди долари, и посочи дека ќе биде на челната позиција само на ограничено време, за да изврши организациски ремонт за кој сметаше дека е неопходен за компанијата да продолжи напред. Маск се пожали дека има „премногу работа“ и дека спие во седиштето на „Твитер“ во Сан Франциско додека ги спроведуваше радикалните промени.
Во декември Маск преку анкета ги праша своите следбеници на платформата дали треба да се повлече од функцијата извршен директор, а 57,5 отсто одговорија потврдно. Милијардерот ќе остане извршен претседател и по транзицијата.
Bloomberg
Маск, кој е и извршен директор на „Тесла“ (Tesla) и „Спејс екс“ (Space Exploration Technologies), се соочи со критики за неговите ненадејни промени во политиката на „Твитер“ и занемарувањето на другите негови бизниси. Тој исто така го смени корпоративното име на матичната компанија на „Твитер“ во „Екс холдингс“ (X Holdings), ентитет што на крајот би можел да биде матична компанија за сите негови фирми - идеја за која зборуваше гласно и јавно. Маск исто така рече дека сака да го надгради „Твитер“ и надвор од сферата на социјалните мрежи во „апликација за сè“, вклучувајќи и за финансиски услуги.
.webp){kind=icon}
