„Визер“ ќе воспостави шести авион во базата во Скопје

Авиокомпанијата „Визер“ најави шести воздухоплов во базата во Скопје. Генералниот директор на „ТАВ Македонија“, Неџат Курт, на денешната прес-конференција изјави дека со новиот воздухоплов ќе се придонесе за зголемување на операциите на скопскиот аеродром и, покрај тековните фреквенции на дестинациите што ги оперира „Визер“, ќе придонесе и за нови дестинации што ќе бидат воведени во иднина.

„Како што сте запознаени досега, од неодамна почна да оперира компанијата 'Луфтханза' до Франкфурт, од 12 мај 'Кроација ерлајнс' почна да лета до Сплит, а во јуни планираме воведување нова авиолинија со 'Норвежијан ерлајнс' до Осло. Авиокомпанијата 'Визер' најави дека ќе воведе две нови линии во септември и во декември, до Љубљана и до Луксембург. Тоа се новините засега од скопскиот аеродром. Што се однесува до аеродромот во Охрид, наскоро ги очекуваме првите летови од Манчестер и од Гетвик, потоа имаме најава за почеток на авиолинијата на 'Ер Србија' на релацијата Охрид - Белград и со тоа патниците што досега доаѓаа со автобус во Охрид, сега можат да си го испланираат патувањето по воздушен пат. Се радуваме на сето ова“, рече Курт, нагласувајќи дека работат и на повторно воведување на релацијата Скопје - Барселона.

МИА

 

Роланд Тишнер, менаџер за операции на „Визер Унгарија“, зборуваше за операциите, работењето и одржливоста на „Визер“, бидејќи, како што кажа, животната средина е сѐ повеќе во фокусот. Тишнер се осврна и на персоналот во „Визер“.

„Во однос на пилотите, може да се пофалиме дека имаме една од најдобрите програми за обука за пилоти. Во однос на кабинскиот екипаж, може да напоменеме дека над 70 проценти од сите што се ангажирани имаат завршено високо образование. Кабинскиот екипаж најчесто го избираме односно го ангажираме од местата каде што се нашите бази, локално. Моментално во Македонија имаме вработено над 250 лица“, подвлече Тишнер.

Тој потсети и на почетоците на компанијата, која во Скопје започна да оперира во текот на летото во 2011 година.
„Базата во Скопје ја отворивме во октомври 2012 година. Тогаш, во 2012 година, започнавме само со еден воздухоплов во базата, сега имаме пет, а наскоро ќе има и шести. Ќе го базираме и шестиот воздухоплов на ’Визер’ во базата во Скопје во декември годинава. Со базирањето на шестиот воздухоплов ќе оперираме до 35 дестинации во 15 држави. Бројот на летови на неделно ниво ќе биде зголемен на девет дестинации, а ќе бидат воведени две нови дестинации. Ќе летаме од Скопје до Луксембург и од Скопје до Љубљана. Од 18 декември ќе почне да сообраќа линијата Скопје - Луксембург, додека Скопје  -Љубљана ќе почне да сообраќа на 27 септември“, појасни Тишнер.

МИА

 

Министерот за транспорт и врски Благој Бочварски упати честитки до ТАВ и „Визер“ за проширувањето на базата во земјава.

„Преку овие примери само ги потврдуваме успешните политики што ги преземаме како влада, во насока на развој на авиосообраќајот, преку воведување нови дестинации од двата аеродрома, а со тоа и континуирано зголемување на бројот на патници“, рече министерот, напоменувајќи дека имаат успешна соработка со „Визер“, но и со други авиокомпании и заеднички се придонесува за развој на цивилното воздухопловство во државата.

Тој нагласи дека оваа година ќе биде уште една рекордна.

„Веќе сме на добар пат за тоа. Во првите четири месеци од годинава имаме раст на бројот на патници за 44 проценти во споредба со минатата година, или раст од 11 проценти во споредба со 2019 година, која беше најдобра година, со најголем број на патници“, информираше министерот, соопштувајќи дека во овој момент може да се лета до близу 50 дестинации во Европа.

Министерот најави дека од наесен, токму преку финансиската поддршка што ја овозможува Владата, „Визер“ ќе воведе уште четири нови дестинации. Тој нагласи дека како резултат на сите овие бројки може да се заклучи дека финансиската помош е оправдана и ги дава очекуваните резултати.

„Владата на Република Северна Македонија е силно посветена на реализација на програмската определба за развој на авиосообраќајот заради поефикасно поврзување со земјите од Европа и пошироко“, нагласи Бочварски, додавајќи дека крајна цел е да се искористат сите капацитети што ги нудат двата аеродрома во државата и да се овозможат квалитетни услуги за патниците.

„Финансиската поддршка за поттикнување и развој на воздушниот сообраќај во Република Северна Македонија ја имплементираме заради квалитетен развој на цивилното воздухопловство, формирање поконкурентни цени и обезбедување нови дестинации за нашите граѓани, а во функција на развој на економијата, образованието, културата, здравството и туризмот“, рече Бочварски. Тој додаде дека денешниот настан е чекор напред кон побрз, модерен и ефикасен авиосообраќај во државата.

„Ќе продолжиме да ги следиме светските трендови и во иднина Владата, ТАВ и авиокомпаниите заеднички ќе работат на создавање уште поповолна клима и развој на авиосообраќајот“, нагласи министерот.

Во моментов нема коментари за веста. Биди прв да коментира...

Остави коментар