Од 12 мај до средината на октомври ќе бидат воведени сезонски авионски летови од Скопје до Сплит, со кои хрватскиот национален авиопревозник „Кроација ерлајнс“ директно ќе го поврзува македонскиот главен град со хрватското крајбрежје во текот на туристичката сезона.
Како што беше најавено на презентацијата на новата сезонска авионска линија, „Кроација ерлајнс“ ќе лета двапати неделно меѓу Скопје и Сплит. Полетувањето од Меѓународниот аеродром-Скопје ќе биде секоја среда и сабота во 5.45 часот наутро, а пристигнувањето на аеродромот во Сплит во 7.10 часот. Летовите од сплитскиот аеродром до Меѓународниот аеродром-Скопје ќе сообраќаат секој вторник (заминување во 22 часот, а пристигнување на скопскиот аеродром во 23.05 часот) и секој петок (заминување од Сплит во 21.35 часот, а пристигнување на скопскиот аеродром во 23 часот).
Летовите ќе бидат со авион „ербас 319“, со капацитет од 144 седишта. Повратните авиобилети за линијата Скопје - Сплит може да се купат по цени почнувајќи од 119 евра, онлајн, преку интернет-страницата на „Кроација ерлајнс“ (www.croatiaairlines.com) или преку мобилната апликација.
Од ТАВ информираат дека во првиот квартал годинава на двата аеродрома во земјава се превезени речиси 500.000 патници, што е зголемување за 41 отсто во однос на истиот период лани. Во исто време бројот на летови на двата аеродрома изнесува 4.169, што претставува годишен пораст од 39 проценти.
.webp){kind=icon}
