.webp){kind=icon}
Во вторникот „Атлантик група“ (Atlantic Grupa) предаде обврзувачка понуда за купување на „Штраус Адриjатик“ (Strauss Adriatic), која „Штраус“ и официјално ја прифати.
„Обврзувачката понуда се заснова на вкупната вредност на трансакцијата (enterprise value) во износ од 40,5 милиони евра, без долг и готовина, односно со претпоставка за редовно ниво на нормализиран нето-работен капитал на денот на склучување на трансакцијата. 'Штраус' е познат по силните брендови на кафе на српскиот пазар - 'Донкафе' (Doncafe) и 'Ц кафе' (C kafa), кои преку аквизицијата би им се придружиле на регионалните лидери 'Гранд кафе' (Grand kafa) и 'Баркафе' (Barcaffe). Покрај познатите брендови, 'Атлантик' би презел и модерен производствен капацитет во индустриската зона Шимановци, во близината на Белград, и 220 вработени“, се наведува во соопштението од „Атлантик група“.
Склучувањето на трансакцијата сепак мора да биде одобрено од Комисијата за заштита на конкуренцијата во Србија.
„Оваа аквизиција е целосно во согласност со стратегиската определба да ја зајакнеме нашата основна дејност. По одобрување од Комисијата, ќе ми биде задоволство да ги пречекам 'Донкафе', 'Ц кафе', односно колегите што заедно со нив влегуваат во нашиот систем. Исклучително сум задоволен од изгледите за заеднички раст и развој“, коментира Мате Штетиќ, потпретседател на „Атлантик група“ за стратегиските области кафе односно слатко и солено.
„Среќни сме што најдовме стратегиски партнер што ќе биде еднакво посветен на развојот на нашиот досегашен бизнис во Србија, како на нашите силни брендови, така и на нашите вработени и самата категорија кафе. Горди сме на резултатите што досега ги постигнавме како компанија и убедени сме дека, по одобрувањето од регулаторните органи, 'Атлантик група' ќе продолжи успешно да го развива интегрираниот бизнис со кафе на српскиот пазар“, заклучи извршниот директор на „Штраус Адриjатик“, Синиша Даничиќ.
Во соопштението за медиумите се наведува дека „Атлантик група“ има намера значително да инвестира во развојот на бизнисот со кафе во малопродажбата и сегментот HoReCa.
„Развојот на клучните категории на производи (кафе, чоколадо и слатки и солени грицки, мачканици и безалкохолни пијалаци), органски и со аквизиција на силни брендови во овие категории, е основата на развојната стратегија на компанијата. Најновата аквизиција е важен чекор на патот кон реализација на стратегијата, како и придонес за растот на категоријата кафе во Србија и регионот и зајакнување на конкурентноста на регионалната индустрија за кафе и локалните брендови“, заклучуваат во соопштението за медиуми од „Атлантик“.
