.webp){kind=icon}
Најголемата светска компанија за ископување железна руда и врвниот производител на челик се здружуваат за да соработуваат на проекти за намалување на емисиите на јаглерод во високозагадувачкиот сектор за производство на челик.
„Рио Тинто груп“ (Rio Tinto Group) и „Чајна Баоу стил груп“ (China Baowu Steel Group Corp.) потпишаа меморандум за разбирање за истражување на неколку иницијативи, вклучувајќи и поставување објекти за зелен челик во Кина и Западна Австралија, се наведува во соопштението на „Рио“.
Ваков меморандум за соработка е пример за рудниците што работат со клиенти од челичниот сектор, додека тој - еден од најголемите извори на глобални емисии - се обидува да се декарбонизира. Пекинг вети дека кинеската челична индустрија ќе достигне врвни емисии на јаглерод до 2030 година и нето нула до 2060 година.
Производителите на челик се на почетокот на децениската смена од високите печки на јаглен, кои доминираат во индустријата. Голема пречка за австралиските рудари како „Рио“ е тоа што нивната руда можеби не е погодна за постројки што зависат од водород наместо од јаглен.
„Овој меморандум има цел да одговори на еден од најголемите предизвици со кои се соочува индустријата – развивање патека со ниско количество на јаглерод за железни руди со ниска до средна класа, кои сочинуваат огромно мнозинство од глобалното снабдување со железна руда“, изјави главниот комерцијален директор на „Рио“, Алф Бариос.
„Рио“ и „Баоу“ се согласија да истражат голем број проекти заедно, вклучувајќи:
Пилотска фабрика за директно намалено железо во Кина.
Подобра технологија за изработка на висококвалитетни пелети железна руда од австралиски руди.
Понатамошно развивање на технологијата на „Баоу“ за намалување на емисиите од високите печки.
Проучување потенцијална фабрика за железо со малку јаглерод во Западна Австралија.
Австралиската компанија „Рио Тинто“ беше доста актуелна откако минатата година предизвика серија протести во соседна Србија, а по објавата дека во таа земја ќе изгради најголем рудник за литиум во Европа, вреден 2,4 милијарди долари. Одлуката за изградбата беше стопирана, но српскиот претседател Александар Вучиќ на почетокот на годинава изјави дека Србија би можела да ја преиспита својата одлука да го блокира проектот.
Протестите на еколошките здруженија и на опозицијата поради ризикот од загадување ја наведоа премиерката Ана Брнабиќ да го запре развојот на тој проект пред година и половина. „Нацијата не треба да ја пропушти можноста да ги искористи своите огромни резерви на литиум“, рече Вучиќ, додавајќи дека стопирањето на проектот е „многу неодговорно“.
„Ќе разговарам за тоа со владата во одреден момент“, рече Вучиќ во интервју за „Блумберг“ во Белград во јануари. „Ние сме единствената земја што всушност се воздржа од експлоатација“.
Српската редакција на „Блумберг Адрија“ во април годинава пишуваше дека компанијата „Рио Тинто“ повеќе од две години се обидува да добие од Министерството за рударство и енергетика одобрение за експлоатациско поле, односно документ што ѝ дозволува да започне со ископување литиум во Србија, и покрај тоа што ја нема целата потребна документација.
